തിരുവനന്തപുരം: രാഹുലിന്റെ കളവ് തെളിയിക്കുന്നതാണ് പുതിയ സിസിടിവി ദൃശ്യങ്ങളെന്ന് സിപിഎം സംസ്ഥാന സെക്രട്ടറി എം വി​ ​ഗോവിന്ദൻ. കള്ളം പറഞ്ഞ് രക്ഷപ്പെടാനുള്ള ശ്രമം പൂർണമായി പൊളിഞ്ഞിരിക്കുകയണെന്ന് എം വി ​ഗോവിന്ദൻ പരിഹാസരൂപേണ പറഞ്ഞു. കൊണ്ടുപോയത് എൻ്റെ വസ്ത്രമാണെന്ന് പറഞ്ഞത് നുണയെന്ന് വ്യക്തമായി. കളവിൽ നിന്ന് രക്ഷപെടാൻ വേണ്ടി രാഹുൽ ഓരോന്ന് മാറ്റി മാറ്റി പറഞ്ഞുകൊണ്ടിരിക്കുകയാണെന്ന് ​ഗോവിന്ദൻ കുറ്റപ്പെടുത്തി. 

വയനാട് കോൺഗ്രസ് നേതാക്കളുടെ ചിത്രം ഉള്ള ഭക്ഷ്യകിറ്റ് പിടികൂടിയ സംഭവത്തിൽ, വിവിധ രീതിയിലുള്ള ആനുകൂല്യങ്ങൾ കൊടുത്ത് വോട്ട് വാങ്ങുന്നുവെന്നും ​ഗോവിന്ദൻ വിമർശിച്ചു. ജനങ്ങളെ അപമാനിക്കുന്ന പരസ്യമായ രീതിയിലേക്കാണ് കോൺ​ഗ്രസ് പോകുന്നുവെന്നും അദ്ദേഹം അഭിപ്രായപ്പെട്ടു. രാഹുൽ കളളപ്പണത്തിന് പൈലറ്റ് പോയെന്നാണ്  സിപിഎം ജില്ലാ സെക്രട്ടറി ഇഎൻ സുരേഷ് ബാബു ഇതിനെക്കുറിച്ച് പ്രതികരിച്ചത്. 

കോൺ​ഗ്രസ് കളളപ്പണം കടത്തിയെന്ന ആരോപണത്തിൽ പുതിയ സിസിടിവി  ദൃശ്യങ്ങള്‍ സിപിഎം പുറത്തുവിട്ടിരുന്നു. കെപിഎം ഹോട്ടലിന് പുറത്തുള്ള ദൃശ്യങ്ങളാണ് സിപിഎം പുറത്ത് വിട്ടത്. ഇന്നലെ ഹോട്ടലിൻ്റെ അകത്തുള്ള ദൃശ്യങ്ങൾ സിപിഎം പുറത്തുവിട്ടിരുന്നു. ദൃശ്യങ്ങളിൽ കെഎസ്‍യു നേതാവായ ഫെന്നി നൈനാൻ നീല ട്രോളി ബാ​ഗുമായി പോകുന്നത് കാണാമായിരുന്നു. എന്നാൽ ട്രോളി ബാ​ഗിൽ വസ്ത്രങ്ങളായിരുന്നുവെന്നാണ് രാഹുൽ മാങ്കൂട്ടത്തില്‍ പറഞ്ഞത്.

ഫെന്നി ട്രോളി ബാഗ് വെച്ച കാറിൽ അല്ല രാഹുൽ മാങ്കൂട്ടത്തിൽ പോയതെന്നു ദൃശ്യങ്ങളിൽ വ്യക്തമാണ്. രാഹുൽ പോയത് മറ്റൊരു കാറിലാണ്. പിന്നീട് ട്രോളി ബാഗ് വെച്ച കാർ രാഹുൽ പോയ കാറിനെ പിന്തുടരുന്നുണ്ടായിരുന്നു. ഇതാണ് ദൃശ്യങ്ങളിലുള്ളത്. വസ്ത്രങ്ങളുള്ള ബാ​ഗാണെങ്കിൽ രാഹുൽ മാങ്കൂട്ടത്തിൽ എന്തുകൊണ്ട് ആ കാറിൽ പോയില്ലെന്നാണ് സിപിഎം ഉയർത്തുന്ന വാ​ദം.