ദുബൈ/റിയോ ഡി ജനീറോ: അബൂദബി കിരീടാവകാശി ഷെയ്ഖ് ഖാലിദ് ബിന്‍ മുഹമ്മദ് ബിന്‍ സായിദ് അല്‍ നഹ്യാന്‍ ബ്രസീല്‍ പ്രസിഡന്റ് ലൂയിസ് ഇനാസിയോ ലുല ഡ സില്‍വയുമായി കൂടിക്കാഴ്ച നടത്തി.

യുഎഇയും ബ്രസീലും തമ്മിലുള്ള സൗഹൃദവും വിവിധ മേഖലകളിലുള്ള സഹകരണവും ശക്തിപ്പെടുത്തുന്നതിനുള്ള സാധ്യതകള്‍ ചര്‍ച്ച ചെയ്യുകയും ഇരു രാജ്യങ്ങളുടെയും പൊതു താല്‍പ്പര്യങ്ങള്‍ നിറവേറ്റുന്നതിനായി ഇരു രാജ്യങ്ങളുടെയും ബന്ധം കൂടുതല്‍ വികസിപ്പിക്കുന്നതിനുള്ള അവസരങ്ങള്‍ ആരായുകയും ചെയ്തു. 

അബൂദബി കിരീടാവകാശിയും ബ്രസീല്‍ പ്രസിഡന്റും യുഎഇയും ബ്രസീലും തമ്മിലുള്ള വിവിധ മേഖലകളില്‍ പ്രത്യേകിച്ച് സമ്പദ്‌വ്യവസ്ഥ, നിക്ഷേപം, പുനരുപയോഗ ഊര്‍ജം, സുസ്ഥിരവികസനം തുടങ്ങിയ മേഖലകളില്‍ ഉഭയകക്ഷി ബന്ധത്തിന്റെ വികാസം അവലോകനം ചെയ്തു. ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിന്റെ 50ാം വാര്‍ഷികവും ചര്‍ച്ചാവിഷയമായി. 

അബൂദബി കിരീടാവകാശിയും ബ്രസീല്‍ പ്രസിഡന്റും ബ്രസീലിലെ തന്ത്രപ്രധാന മേഖലകളില്‍ യുഎഇ നിക്ഷേപം പ്രോത്സാഹിപ്പിക്കുന്നതിന് ഒരു സംയുക്ത സംവിധാനം സ്ഥാപിക്കുന്നതിനുള്ള ധാരണാപത്രത്തില്‍ ഒപ്പുവച്ചു. യുഎഇ നിക്ഷേപ മന്ത്രി മുഹമ്മദ് ഹസന്‍ അല്‍സുവൈദിയും ബ്രസീല്‍ പ്രസിഡന്‍സി ചീഫ് ഓഫ് സ്റ്റാഫ് റൂയി കോസ്റ്റയും കരാറില്‍ ഒപ്പുവച്ചു.