മണ്ണഞ്ചേരി: പുതിയതായി രൂപപ്പെടുത്തിയ പഴയങ്ങാടി മാളിലേക്ക് നാടൊന്നാകെ ഒഴുകിയെത്തിയതോടെ ഉദ്ഘാടനദിനത്തിലെ കച്ചവടം പൊടിപൊടിച്ചു.
ഇന്നലെ രാവിലെ 7.30 ന് ആര്യാട് ബ്ലോക്ക് പഞ്ചായത്ത് പ്രസിഡന്റ് അഡ്വ.ഷീന സനല്‍കുമാര്‍ ചന്തയുടെ ഉദ്ഘാടനം നിര്‍വ്വഹിച്ചു. ഉദ്ഘാടനത്തിന് മുന്‍പുതന്നെ ചന്തയും പരിസരവും നാട്ടുകാരുടെ പങ്കാളിത്തംകൊണ്ട് നിറഞ്ഞിരുന്നു. മണ്ണഞ്ചേരി പഞ്ചായത്തും വ്യാപാരിവ്യവസായി സമിതിയും സംയുക്തമായാണ് പഴയങ്ങാടിമാള്‍ എന്ന ആഴ്ച ചന്തയ്ക്ക് രൂപം നല്‍കിയത്.
വിവിധതരം അച്ചാറുകള്‍,പപ്പടം,തൈര്,ജൈവപച്ചക്കറികള്‍,ഉപ്പിലിട്ട വിഭവങ്ങള്‍,തേന്‍,ധാന്യപൊടികള്‍,കറിപൊടികള്‍,കൈത്തറി തുണികള്‍, കായല്‍ മത്സ്യങ്ങള്‍, വിവിധതരം കോഴികുഞ്ഞുങ്ങള്‍, നാടന്‍മുട്ട, സുഗന്ധ തൈലങ്ങള്‍, ഔഷധസസ്യങ്ങള്‍ എന്നിവ ആദ്യദിനംതന്നെ തുറന്നചന്തയില്‍ ഇടംതേടിയിരുന്നു. ചന്തയുടെ തുടക്കത്തില്‍ ഒരുമണിക്കൂറിനുള്ളില്‍ തന്നെ വില്‍പ്പനയ്‌ക്കെത്തിച്ച ഒട്ടുമിക്കവയും കാലിയായി. ആദ്യവില്‍പ്പന ജില്ലാപഞ്ചായത്തംഗം പി.എ.ജുമൈലത്തില്‍ നിന്നും സിറാജ് കമ്പിയകം ജൈവപച്ചക്കറികിറ്റുവാങ്ങി നിര്‍വ്വഹിച്ചു. മണ്ണഞ്ചേരിയിലെ വള്ളക്കടവില്‍ പഞ്ചായത്തുവക ഭൂമിയിലാണ് ചന്തയുടെ പ്രവര്‍ത്തനം. എല്ലാവെള്ളിയാഴ്ചയിലും രാവിലെ 6 മുല്‍ 10 വരെയാകും ഓപ്പണ്‍മാര്‍ക്കറ്റ് പ്രവര്‍ത്തിക്കുക. ചന്തയിലേക്ക് ജൈവഉല്‍പ്പന്നങ്ങള്‍ വിളയിക്കാന്‍ മണ്ണഞ്ചേരിയിലെ വ്യാപാരിയായ അഷറഫ് കരിമുറ്റം രണ്ടേക്കര്‍ ഭൂമി വാടകയില്ലാതെ വ്യാപാരിവ്യവസായി സമിതിക്കുനല്‍കി. ഉദ്ഘാടനദിനത്തില്‍ തന്നെ കഞ്ഞിക്കുഴിയിലെ ജൈവവിളകള്‍ വില്‍പ്പനനടത്തുന്ന മൊബൈല്‍ യൂണിറ്റ് മണ്ണഞ്ചേരിയില്‍ എത്തിയിരുന്നു.
ഉദ്ഘാടനസമ്മേളനത്തില്‍ അഡ്വ. ആര്‍ റിയാസ് അധ്യക്ഷതവഹിച്ചു ബ്ലോക്ക് പഞ്ചായത്ത് പ്രസിഡന്റ് അഡ്വ.ഷീനസനല്‍കുമാര്‍,ജില്ലാപഞ്ചായത്തംഗം പി.എ.ജുമൈലത്ത്,ഗ്രാമപഞ്ചായത്ത് വൈസ്പ്രസിഡന്റ് മഞ്ജുരതികുമാര്‍,എം.എസ്.സന്തോഷ്,പി.രഘുനാഥ്,വി.വേണു,സി.എ.ബാബു,മൊയ്തീന്‍കുഞ്ഞാശാന്‍,അബ്ദുള്‍നിസാര്‍,സിറാജ് കമ്പിയകം,ജാബിര്‍ നൈന,അനസ് അടിവാരം,മുഹമ്മദ് മുസ്തഫ,അസ്‌ലം കോര്യംപള്ളി സംസാരിച്ചു.