കുവൈത്ത് സിറ്റി : കുവൈത്തിൽ 60 വയസിനു മുകളിൽ പ്രായമായവർക്ക് വിസ പുതുക്കുന്നതിനു ഏർപ്പെടുത്തിയ നിയന്ത്രണം രാജ്യം ഇത് വരെ  ഉയർത്തി പിടിച്ച  മാനവിക ചരിത്രത്തിന് അപമാനമാണെന്ന് ആക്റ്റിങ് പ്രധാന മന്ത്രിയുംആഭ്യന്തര, പ്രതി രോധ മന്ത്രിയുമായ ഷെയ്ഖ് ഫഹദ് അൽ യൂസുഫ് പ്രസ്ഥാവിച്ചു. എല്ലാ തൊഴിലാളികളുടെയും ഭൂമിയിലെ ഏറ്റവും  സുരക്ഷിത താവളമാണ് കുവൈത്ത്. കുവൈത്തിൽ  ജനിച്ചവരും   ജീവിതത്തിൻ്റെ പകുതിയിലധികം ഇവിടെ ചെലവഴിച്ചവരുമായ   പ്രവാസികൾ  സത്യസന്ധതയും  ആത്മാർത്ഥതയും ബഹുമാനവും  പുലർത്തി കൊണ്ട് ജീവിക്കുന്നവരാണ്.  തങ്ങൾ അവരോട് നീതി പുലർത്തുകയും അവസാനം അവരെ അവരുടെ സംഭാവനകൾക്ക് അഭിനന്ദിക്കുകയും ചെയ്യുന്നു. തങ്ങളുടെ രണ്ടാമത്തെ മാതൃഭൂമിയായി കുവൈത്തിനെ  കരുതുന്നവരാണ്  പ്രവാസികൾ അധികവും. അത് കൊണ്ട് തന്നെയാണ്  കുവൈത്ത്  വിട്ടുപോകാൻ പ്രവാസികൾ  ആഗ്രഹിക്കാത്തത് എന്നും അദ്ദേഹം പ്രാദേശിക ദിന പത്രത്തിനു നൽകിയ അഭിമുഖത്തിൽ അദ്ദേഹം വ്യക്തമാക്കി. 2021 ജനുവരിയിലാണ് 60 വയസ്സിനു മുകളിൽ പ്രായമായ ബിരുദ ധാരികൾ അല്ലാത്ത പ്രവാസികൾക്ക് താമസ രേഖ പുതുക്കുന്നതിനു നിയന്ത്രണം ഏർപ്പെടുത്തിയത്. ഈ വിഭാഗത്തിൽ പെട്ടവർക്ക് പ്രത്യേക ഇൻഷുറൻസ് ഉൾപ്പെടെ പ്രതി വർഷം ആയിരം ദിനാർ അധിക ഫീസ് നൽകണം എന്നാണ് വ്യവസ്ഥ. ഇതേ തുടർന്ന് മലയാളികൾ ആയിരക്കണക്കിന് പ്രവാസികൾക്കാണ് രാജ്യം വിടെണ്ടി വന്നത്. ആഭ്യന്തര മന്ത്രിയുടെ നിർദേശ പ്രകാരം വരും ദിവസങ്ങളിൽ ഈ നിയന്ത്രണം എടുത്തു കളയുമെന്നാണ് റിപ്പോർട്ടുകൾ.