ഹൈദരാബാദ്: പുഷ്പ2 റിലീസുമായി ബന്ധപ്പെട്ട് ഉണ്ടായ തിക്കിലും തിരക്കിലുംപെട്ട് യുവതി മരിച്ച സംഭവത്തില്‍ റിമാന്‍ഡിലായ നടന്‍ അല്ലു അര്‍ജുന്‍ ജയില്‍ മോചിതനായി. ഇന്നു രാവിലെയാണ് ചഞ്ചല്‍ഗുഡ ജയിലില്‍ നിന്ന് അര്‍ജുന്‍ അര്‍ജുന്‍ പുറത്തിറങ്ങിയത്. പൊലിസിന്റെ ഭാഗത്ത് നിന്ന് അനാസ്ഥയുണ്ടായതായി അല്ലു അര്‍ജുന്റെ അഭിഭാഷകന്‍ ആരോപിച്ചു.

തെലങ്കാന ഹൈക്കോടതി ഇന്നലെ ഇടക്കാല ജാമ്യം നല്‍കിയിരുന്നെങ്കിലും, ജാമ്യ ഉത്തരവിന്റെ പകര്‍പ്പ് വൈകിയതിനാല്‍ അല്ലു അര്‍ജുന് ജയിലില്‍ തുടരേണ്ടി വരികയായിരുന്നു. നടനെ അറസ്റ്റ് ചെയ്തതിനെ തുടര്‍ന്ന് നഗരത്തില്‍ ആരാധകര്‍ പ്രതിഷേധവമായി രംഗത്തെത്തിയിരുന്നു.

സോഷ്യല്‍ മീഡിയയിലും വ്യാപക പ്രതിഷേധമുയര്‍ന്നിരുന്നു. മുഖ്യമന്ത്രി രേവന്ത് റെഡ്ഡിക്കെതിരെ വ്യക്തിപരമായിപ്പോലും പ്രതിഷേധങ്ങള്‍ കനക്കുകയാണ്. അറസ്റ്റിലായ തീയറ്റര്‍ ഉടമകളും ജയില്‍ മോചിതരായി.