ഉരുവച്ചാല്‍: ലൈസന്‍സ് ഇല്ലാതെ കുട്ടി ഡ്രൈവര്‍മാര്‍ വാഹനവുമായി ചീറിപ്പായുന്നത് അപകട ഭീഷണി ഉയര്‍ത്തുന്നു. രാപകല്‍ ഭേദമില്ലാതെയാണ് ഇവര്‍ ബൈക്കുമായി വിലസുന്നത്. സ്‌കൂള്‍ സമയത്താണ് ഉരുവച്ചാല്‍ ശിവപുരം റോഡ് കുട്ടി ഡ്രൈവര്‍മാരുടെ അഭ്യാസ ട്രാക്കായി മാറുന്നത്.
സ്‌കൂളില്‍ പോകാന്‍ ബൈക്ക് ഉപയോഗിക്കുന്ന കുട്ടികള്‍ അമിതവേഗതയില്‍ മൂന്നുപേരെ വരെ കയറ്റിയാണ് യാത്ര ചെയ്യുന്നത്. ലൈസന്‍സോ ഹെല്‍മറ്റോ ഇല്ലാതെ പരസ്യമായി നിയമം ലംഘിച്ച് ബൈക്കില്‍ ചെത്തുന്ന ഇത്തരക്കാര്‍ മൈനര്‍ പരിധിയില്‍ വരുന്നതിനാല്‍ നിയമപരമായി നേരിടാന്‍ കഴിയാത്തതും പൊലിസിനെ വലയ്ക്കുന്നു. ഇരുചക്ര വാഹന യാത്രക്കാരെ ഓടിച്ചിട്ടു പിടിക്കാന്‍ പാടില്ലെന്ന നിയമവും പൊലിസിന്റെ കൈകള്‍ക്ക് കൂച്ചു വിലങ്ങിടുന്നു. പൊലിസ് കൈകാണിക്കുമ്പോള്‍ അമിതവേഗത്തില്‍ പറക്കുന്ന ഇവരുടെ ബൈക്കിന്റെ നമ്പര്‍ പോലും നോട്ടുചെയ്യാന്‍ പൊലിസിന് പറ്റാറില്ല. ചിലര്‍ നമ്പര്‍ പ്ലേറ്റില്‍ ചെളിയോ കരി ഓയിലോ തേച്ചായിരിക്കും യാത്ര. ചില ബൈക്കിന് വ്യാജ നമ്പര്‍ പ്ലേറ്റായിരിക്കും ഉണ്ടാകുക. നമ്പര്‍പ്ലേറ്റ് പോലും ഇല്ലാത്ത ബൈക്കുകളും കുട്ടി ഡ്രൈവര്‍മാര്‍ റോഡിലിറക്കുന്നുണ്ട്. തങ്ങളുടെ മക്കള്‍ ബൈക്കില്‍ ചെത്തി നടക്കുന്നത് അഭിമാനമായി കരുതുന്ന ചില മാതാപിതാക്കള്‍ എത്ര വിലകൊടുത്തും കുട്ടികള്‍ക്ക് ബൈക്ക് വാങ്ങിക്കൊടുക്കുന്നതാണ് കുട്ടികളെ ഇത്തരം പ്രവണതകള്‍ക്ക് പ്രേരിപ്പിക്കുന്നതെന്ന് ഉദ്യോഗസ്ഥര്‍ പറയുന്നു. കുട്ടി ഡ്രൈവര്‍മാരുടെ അമിതവേഗത മറ്റു ഡ്രൈവര്‍മാര്‍ക്കും ഭീഷണിയാകുന്നുണ്ട്. ശിവപുരം ഉരുവച്ചാല്‍ റോഡിലിറങ്ങുന്ന കുട്ടിഡ്രൈവര്‍മാരെ നിയന്ത്രിക്കാന്‍ അധികൃതര്‍ ഉടന്‍ ഇടപെട്ടില്ലെങ്കില്‍ നിരത്തുകളിലെ ദാരുണമരണങ്ങള്‍ വര്‍ധിക്കുമെന്നാണ് നാട്ടുകാരുടെ ആശങ്ക.