കോഴിക്കോട്: കുറ്റിച്ചിറ ജുമുഅത്ത് പള്ളിയുടെ ഭൂമി സ്വകാര്യ വ്യക്തികള്‍ കൈയേറിയതായി ടൗണ്‍ പൊലിസില്‍ പരാതി. 1905 മുതല്‍ വലിയ ഖാസി വിഭാഗം ഉപയോഗിച്ച കുറ്റിച്ചിറയിലെ കെട്ടിടവും സ്ഥലവുമാണ് മുസ്‌ലിം ഫ്രന്റ്‌സ് സൊസൈറ്റിയുടെ പേരില്‍ ചില ആളുകള്‍ കൈയേറിയതായി പരാതി നല്‍കിയത്.
ജുമുഅത്ത് കമ്മിറ്റി ഭാരവാഹി കൂടിയായ എസ് എം ബഷീര്‍ ഹാജിയുടെ കൈവശമുള്ള എട്ട് സെന്റ് സ്ഥലത്താണ് കെട്ടിടം. ഫ്രന്റ്‌സ് സൊസൈറ്റിയുടേയും മഹല്ലിന്റേയും പ്രസിഡന്റായിരുന്ന അദ്ദേഹം 1997ല്‍ ഫ്രന്റ്‌സ് സൊസൈറ്റിയുടെ പ്രവര്‍ത്തനം അവസാനിപ്പിച്ച് കെട്ടിടവും എട്ട് സെന്റ് സ്ഥലവും മഹല്ല് കമ്മിറ്റിക്ക് നല്‍കി. കുറ്റിച്ചിറ ജുമുഅ മസ്ജിദ് കമ്മിറ്റി വഖ്ഫ് ബോര്‍ഡില്‍ രജിസ്റ്ററും ചെയ്തു.

എന്നാല്‍ ഇപ്പോള്‍ ഏതാനും പേര്‍ മുസ്‌ലിം ഫ്രന്റ്‌സ് സൊസൈറ്റി പുനരുജ്ജീവിപ്പിച്ചതായി അവകാശപ്പെടുകയും ഈ കെട്ടിടം കൈയടക്കുകയുമാണ്. ഇതിനെതിരെ മഹല്ല് കമ്മിറ്റി വഖ്ഫ് ട്രൈബ്യൂണലിനെ സമീപിച്ച് അനുകൂല വിധി സമ്പാദിച്ചു. മറു വിഭാഗം ഹൈക്കോടതിയില്‍ അപ്പീല്‍ നല്‍കിയിരിക്കുകയാണ്. ഇതിനിടയിലാണ് ഫ്രണ്ട്‌സ് സൊസൈറ്റി അംഗങ്ങളെന്ന് അവകാശപ്പെടുന്നവര്‍ സ്ഥലത്തെ മരങ്ങള്‍ മുറിച്ച് മാറ്റിയത്. ഇതിനെതിരെയാണ് പൊലിസില്‍ പരാതി നല്‍കിയത്.