മെൽബൺ: ഇന്ത്യയും ഓസ്‌ട്രേലിയയും തമ്മിലുള്ള നാലാം ടെസ്റ്റ് മത്സരത്തിലെ മൂന്നാം ദിവസം അവസാനിച്ചിരിക്കുകയാണ്. കളി നിർത്തുമ്പോൾ ഇന്ത്യ 358 റൺസിന്‌ ഒമ്പത് വിക്കറ്റുകൾ എന്ന നിലയിലാണ്. മൂന്നാം ദിനത്തിൽ ഇന്ത്യൻ നിരയിൽ സെഞ്ച്വറി നേടി നിതീഷ് കുമാർ റെഡ്ഢിയും അർദ്ധ സെഞ്ച്വറി നേടി വാഷിംഗ്ടൺ സുന്ദറുമാണ് തിളങ്ങിയത്. 

ഇരുതാരങ്ങളുടെയും മികച്ച ബാറ്റിങ്ങിലൂടെ ഇന്ത്യൻ ടെസ്റ്റ് ക്രിക്കറ്റ് ചരിത്രത്തിൽ ഇതുവരെ പിറവിയെടുക്കാത്ത ഒരു സംഭവവികാസമാണ് മെൽബണിൽ നടന്നത്. ടെസ്റ്റ് ക്രിക്കറ്റിന്റെ ചരിത്രത്തിൽ ഇതാദ്യമായാണ് എട്ടാം നമ്പറിലും ഒമ്പതാം നമ്പറിലും ഇറങ്ങിയ രണ്ട് ഇന്ത്യൻ താരങ്ങൾ 150+ പന്തുകൾ നേരിടുന്നത്. വാഷിംഗ്ടൺ സുന്ദർ 162 പന്തുകൾ നേരിട്ടുകൊണ്ടാണ് തന്റെ അർദ്ധ സെഞ്ച്വറി പൂർത്തിയാക്കിയത്. നിതീഷ് കുമാർ റെഡ്ഢി 176 പന്തുകളുമാണ് ഇതുവരെ നേരിട്ടിട്ടുള്ളത്. പത്തു ഫോറുകളും ഒരു സിക്സുമാണ് നിതീഷ് നേടിയത്.

ഇരുവരും ചേർന്ന് 127 റൺസിന്റെ കൂട്ടുകെട്ടാണ് പടുത്തുയർത്തിയത്. 221 റൺസിന്‌ ഏഴു വിക്കറ്റുകൾ എന്ന നിലയിൽ നിൽക്കെയാണ് ഇരുവരും മികച്ച കൂട്ടുകെട്ടിലൂടെ ഇന്ത്യയെ കരകയറ്റുകയായിരുന്നു. രണ്ടാം ദിനത്തിൽ  യശ്വസി ജെയ്‌സ്വാളും അർദ്ധ സെഞ്ച്വറി നേടിയിരുന്നു. 118 പന്തിൽ 82 റൺസ് ആണ് ജെയ്‌സ്വാൾ നേടിയത്. 11 ഫോറുകളും ഒരു സിക്‌സും അടങ്ങുന്നതാണ് താരത്തിന്റെ ഇന്നിംഗ്സ്. വിരാട് കോഹ്‌ലി 86 പന്തിൽ 36 റൺസും കെഎൽ രാഹുൽ 42 പന്തിൽ 24 റൺസും നേടി നിർണായകമാവുകയും ചെയ്തു.