ജറൂസലം: ഇസ്‌റാഈല്‍ പാര്‍ലമെന്റില്‍ നിന്ന് രാജിവച്ച് മുന്‍ പ്രതിരോധമന്ത്രി യോവ് ഗാലന്റ്. ബുധനാഴ്ചയാണ് ഗാലന്റി രാജി സമര്‍പ്പിച്ചത്. നെസറ്റ് സ്പീക്കര്‍ ആമിര്‍ ഒഹാനക്ക് ഗാലന്റ് രാജിക്കത്ത് നല്‍കി. 

യുദ്ധക്കളത്തിലെന്നപോലെ, പൊതുസേവനത്തിലും  ആവശ്യമായ ലക്ഷ്യങ്ങള്‍ കൈവരിക്കുന്നതിന് നിങ്ങള്‍ നിര്‍ത്തുകയും സാഹചര്യം വിലയിരുത്തുകയും പ്രവര്‍ത്തനത്തിന്റെ ദിശ തിരഞ്ഞെടുക്കുകയും ചെയ്യേണ്ട നിമിഷങ്ങളുണ്ട്- രാജിക്കത്ത് നല്‍കിയ ശേഷം ഗാലന്റ് പ്രതികരിച്ചു. 

പ്രധാനമന്ത്രി ബെഞ്ചമിന്‍ നെതന്യാഹുവിനെതിരെ പലപ്പോഴും സ്വതന്ത്ര നിലപാട് സ്വീകരിച്ചിരുന്നയാളാണ് ഗാലന്റ്. 2024 നവംബറില്‍ ഗാലന്റിനെ സര്‍ക്കാരില്‍ നിന്നും പുറത്താക്കിയിരുന്നു. പക്ഷേ നെസറ്റിലെ തെരഞ്ഞെടുക്കപ്പെട്ട അംഗമായി സ്ഥാനം നിലനിര്‍ത്തിയിരുന്നു.

പലപ്പോഴും ഗാലന്റ് നെതന്യാഹുവിനോടും തീവ്ര വലതുപക്ഷ, മത പാര്‍ട്ടികളുടെ സഖ്യകക്ഷികളുമായും വിവിധ വിഷയങ്ങളില്‍ വിയോജിപ്പ് രേഖപ്പെടുത്തിയിരുന്നു. തീവ്ര ഓര്‍ത്തഡോക്‌സ് ജൂത പുരുഷന്മാര്‍ക്ക് നിര്‍ബന്ധിത സൈനിക സേവനത്തില്‍ നിന്ന് ഇളവുകള്‍ അനുവദിച്ചത് ഉള്‍പ്പെടെ ഗാലന്റിന്റെ നിലപാടുകള്‍ വിവാദമായിരുന്നു.

2022 അവസാനം ഗവണ്‍മെന്റ് അധികാരമേറ്റതു മുതല്‍ തന്നെ നെതന്യാഹുവും ഗാലന്റും തമ്മിലുള്ള ബന്ധം വഷളായിരുന്നു. പിന്നീട് 2023 മാര്‍ച്ചില്‍, സുപ്രിം കോടതിയുടെ അധികാരങ്ങള്‍ വെട്ടിക്കുറക്കാനുള്ള സര്‍ക്കാര്‍ പദ്ധതി നിര്‍ത്തിവെക്കാന്‍ ആവശ്യപ്പെട്ടതാണ് നെതന്യാഹുമായി ഗാലന്റിന്റെ അകല്‍ച്ച വര്‍ധിപ്പിച്ചത്. യുദ്ധക്കുറ്റങ്ങളും മനുഷ്യരാശിക്കെതിരായ കുറ്റകൃത്യങ്ങളും ആരോപിച്ച് ഗാലന്റിനും നെതന്യാഹുവിനും അന്താരാഷ്ട്ര ക്രിമിനല്‍ കോടതി അറസ്റ്റ് വാറന്റ് പുറപ്പെടുവിച്ചിരുന്നു.

Yoav Gallant, the former Israeli Defense Minister, has resigned from the Knesset, submitting his resignation letter to Knesset Speaker Amir Ohana on Wednesday.