കുവൈത്ത് സിറ്റി: ഇറാഖില്‍ പിടിയിലായ, കുവൈത്ത് കൊടും കുറ്റവാളിയായി പ്രഖ്യാപിച്ച സല്‍മാന്‍ അല്‍ ഖാലിദിനെ ഇന്റര്‍പോളിന്റെ സഹായത്തോടെ കുവൈത്തില്‍ എത്തിച്ചു. ആഭ്യന്തര മന്ത്രാലയമാണ് ഇക്കാര്യം അറിയിച്ചത്. 11 ക്രിമിനല്‍ കേസുകളില്‍ കോടതി ശിക്ഷിച്ച ഇയാള്‍ രാജ്യത്തു നിന്ന് രക്ഷപ്പെട്ടതിനെ തുടര്‍ന്ന് കുവൈത്ത് ഇന്റര്‍പോളിന്റെ സഹായം തേടുകയായിരുന്നു.

2023 ഡിസംബര്‍ 4നു കുവൈത്തില്‍ നിന്നു രക്ഷപ്പെട്ട പ്രതിയ്ക്കു വേണ്ടി എല്ലാ രാജ്യങ്ങളിലേക്കും ഇന്റര്‍പോള്‍ അറസ്റ്റ് വാറണ്ട് അയച്ചിരുന്നു. പ്രതി ഇറാഖില്‍ ഉണ്ടെന്ന് മനസ്സിലായതോടെ ഇറാഖിലെ അധികൃതരുമായി സഹകരിച്ച് പ്രതിയെ അറസ്റ്റ് ചെയ്യുകയായിരുന്നു. 

ഇറാഖ് ആഭ്യന്തര മന്ത്രി അബ്ദുള്‍ അമീര്‍ അല്‍ ഷമ്മാരി, ബസ ഗവര്‍ണര്‍ അസദ് അല്‍ഇദാനി, ഇറാഖി സുരക്ഷാ സേന, ജുഡീഷ്യറി എന്നിവരുള്‍പ്പെടെയുള്ളവരുടെ ആത്മാര്‍ത്ഥമായ പ്രവര്‍ത്തനത്തിനും സഹകരണത്തിനും കുവൈത്ത് ആഭ്യന്തര മന്ത്രാലയം നന്ദി പറഞ്ഞു.

Heinous criminal who escaped from Kuwait arrested in Iraq; Handed over to Kuwait