കല്‍പ്പറ്റ: കോണ്‍ഗ്രസിനെ വെട്ടിലാക്കി ജീവനൊടുക്കിയ വയനാട് ഡി.സി.സി ട്രഷറര്‍ എന്‍.എം വിജയന്റെ ആത്മഹത്യാക്കുറിപ്പ് പുറത്ത്. കത്തില്‍ ഐസി ബാലകൃഷ്ണന്‍ എം.എല്‍.എയ്ക്കെതിരെയും പരാമര്‍ശമുണ്ട്. നിയമനത്തിനെന്ന പേരില്‍ പണം വാങ്ങിയത് എം.എല്‍.എയുടെ നിര്‍ദേശപ്രകാരമാണെന്ന് കത്തില്‍ പറയുന്നു. 

ആത്മഹത്യയ്ക്ക് പിന്നാലെ സുല്‍ത്താന്‍ ബത്തേരി ബാങ്കിലെ നിയമന ക്രമക്കേട് ചര്‍ച്ചയായിരുന്നു. ഇതിനുപിന്നാലെയാണ് ആത്മഹത്യാകുറിപ്പും കത്തും പുറത്തുവന്നിരിക്കുന്നത്. 

വിജയന്റെ വീട്ടില്‍ നിന്നാണ് ആത്മഹത്യാകുറിപ്പ് കണ്ടെത്തിയത്. നാല് പേജുള്ള ആത്മഹത്യാക്കുറിപ്പില്‍ അദ്ദേഹത്തിന് എത്ര സാമ്പത്തിക ബാധ്യത ഉണ്ടെന്നും അത് എങ്ങനെ സംഭവിച്ചു എന്നും വ്യക്തമാക്കുന്നുണ്ട്. ബാങ്കുകളുടെ നിയമനവുമായി ബന്ധപ്പെട്ട് തനിക്ക് കോടികളുടെ ബാധ്യതയുണ്ടായിട്ടുണ്ടെന്നും പല നേതാക്കളും പണം വാങ്ങിയിട്ടുണ്ടെന്നും ഇവര്‍ പണം പങ്കുവെച്ചെന്നും കുറിപ്പില്‍ പറയുന്നു. 

ഐ.സി ബാലകൃഷ്ണന്റെ താല്‍പര്യപ്രകാരം മറ്റൊരാളെ നിയമിക്കാന്‍ മകനെ ബാങ്കിലെ ജോലിയില്‍ നിന്ന് പുറത്താക്കി. വലിയ ബാധ്യതകളുണ്ടായിട്ടും തന്നെ ആരും തിരിഞ്ഞുനോക്കിയില്ലെന്നും ആത്മഹത്യാകുറിപ്പില്‍ പറയുന്നു.