മുംബൈ: സ്മാര്‍ട്ട് ഫോണ്‍  വാങ്ങുന്നതുമായി ബന്ധപ്പെട്ട തര്‍ക്കത്തില്‍ അച്ഛനും മകനും മരിച്ച നിലയില്‍. മഹാരാഷ്ട്രയിലെ മിനാകി ഗ്രാമത്തിലെ നന്ദേഡിലുള്ള കര്‍ഷകനെയും മകനെയുമാണ് മരിച്ച നിലയില്‍ കണ്ടെത്തിയത്. ഇരുവരും ആത്മഹത്യ ചെയ്‌തെന്നാണ് പ്രാഥമിക നിഗമനം. കഴിഞ്ഞ കുറച്ച് നാളുകളായി ഇരുവരും തമ്മില്‍ മൊബൈല്‍ ഫോണ്‍ വാങ്ങുന്നതുമായി ബന്ധപ്പെട്ട് തര്‍ക്കങ്ങള്‍ നിലനിന്നിരുന്നതായി കുട്ടിയുടെ മാതാവ് പറഞ്ഞു. 

കഴിഞ്ഞ കുറച്ച് നാളുകളായി മകന്‍ അച്ഛനോട് പുതിയ സ്മാര്‍ട്ട് ഫോണ്‍ വാങ്ങി തരാന്‍ ആവശ്യപ്പെട്ടിരുന്നു. എന്നാല്‍ സാമ്പത്തിക ബുദ്ധിമുട്ടുകള്‍ മൂലം അച്ഛന്‍ ഈ ആവശ്യം നിരസിച്ചു. കഴിഞ്ഞ ബുധനാഴ്ച്ച വീണ്ടും ഇതേ ആവശ്യവുമായി മകന്‍ എത്തുകയും ഇരുവരും തമ്മില്‍ തര്‍ക്കമുണ്ടാവുകയും ചെയ്തു. തൊട്ടുപിന്നാലെ മകന്‍ വീട് വിട്ട് പോയി. 

മകന്‍ തിരിച്ച് വരാത്തതിനെ തുടര്‍ന്ന് അച്ഛന്‍ നടത്തിയ അന്വേഷണത്തില്‍ കൃഷിയിടത്തില്‍ നിന്ന് മകനെ ആത്മഹത്യ ചെയ്ത നിലയില്‍ കണ്ടെത്തി. ഇതില്‍ മനംനൊന്ത് അച്ഛനും ആത്മഹത്യ ചെയ്‌തെന്നാണ് പൊലിസ് കണ്ടെത്തല്‍. പിന്നീട് കുടുംബം നടത്തിയ തിരച്ചിലിലാണ് കൃഷിയിടത്തില്‍ നിന്ന് ഇരുവരുടെയും മൃതദേഹങ്ങള്‍ കണ്ടെത്തിയത്. 

സംഭവത്തില്‍ കേസെടുത്ത് അന്വേഷണം ആരംഭിച്ചതായി നന്ദേഡ് സ്റ്റേഷന്‍ സൂപ്രണ്ട് അബിനാഷ് കുമാര്‍ പറഞ്ഞു. 

 Argument over buying smart phones Father and son were found dead in maharashtra