കൊച്ചി: കാക്കനാട് 17 വയസ്സുകാരന്‍ ഫ്‌ളാറ്റിലെ സ്വിമ്മിങ് പൂളില്‍ മരിച്ച നിലയില്‍. ഇന്ന് രാവിലെയാണ് സ്വിമ്മിങ് പൂളിനുള്ളില്‍ മൃതദേഹം കണ്ടെത്തിയത്. എറണാകുളം നൈപുണ്യ പബ്ലിക്ക് സ്‌കൂളിലെ പ്ലസ് വണ്‍ വിദ്യാര്‍ഥിയായ ജോഷ്വ ആണ് മരിച്ചത്. തൃക്കാക്കര ഭാരത് മാതാ കോളജിനു സമീപത്തെ ഫ്‌ലാറ്റ് സമുച്ചയത്തിലാണ് സംഭവം.

ഇതേ ഫ്‌ലാറ്റ് സമുച്ചയത്തിലെ നാലാം നിലയിലാണ് കുട്ടിയുടെ കുടുംബം താമസിക്കുന്നത്. രാത്രി 12നു ശേഷമാണ് മരണം നടന്നതെന്നാണ് നിഗമനം. ഫ്‌ലാറ്റില്‍ നിന്ന് വീണതാണോ മറ്റെന്തെങ്കിലും സംഭവിച്ചതാണോ തുടങ്ങിയ വിവരങ്ങള്‍ ലഭ്യമായിട്ടില്ല. അതേസമയം, ഫ്‌ളാറ്റിന്റെ പതിനെട്ടാം നിലയില്‍ നിന്ന് കുട്ടിയുടെ വസ്ത്രങ്ങളും ചെരിപ്പും കണ്ടെത്തിയിട്ടുണ്ട്. തൃക്കാക്കര പൊലിസ് സ്ഥലത്തെത്തി ഇന്‍ക്വസ്റ്റ് നടപടികള്‍ ആരംഭിച്ചു.