കല്ലമ്പലം: നിരവധി കേസുകളില്‍ പ്രതിയായ കുപ്രസിദ്ധ മോഷ്ടാവ് തീവെട്ടി ബാബു അറസ്റ്റില്‍. മടവൂര്‍ മാവിന്‍മൂട്ടില്‍ ഷെരീഫ ബീവിയുടെ ആള്‍താമസമില്ലാത്ത വീട്ടില്‍ കവര്‍ച്ചനടത്തിയ കേസില്‍ പള്ളിക്കല്‍ പൊലിസാണ് ഇയാളെ അറസ്റ്റ് ചെയ്തത്. 

31ന് രാത്രി വീട് കുത്തിത്തുറന്ന് 12 പവന്‍ വരുന്ന സ്വര്‍ണ്ണാഭരണങ്ങളും 50,000 രൂപയും കവര്‍ന്നതിനെ തുടര്‍ന്നാണ് കൊല്ലം പുത്തന്‍കുളം ചിറക്കര കുളത്തൂര്‍ക്കോണം നന്ദു ഭവനത്തില്‍ എ. ബാബു(60) എന്ന തീവെട്ടി ബാബു അറസ്റ്റിലായത്. 

വീട്ടിലെ സി.സി.ടിവി കാമറ തകര്‍ത്താണ് പ്രതിമോഷണം നടത്തിയത്. പരിസരപ്രദേശങ്ങളിലെ നിരീക്ഷണ ക്യാമറാ ദൃശ്യങ്ങള്‍ പരിശോധിച്ചാണ് പൊലിസ് പ്രതിയെ തിരിച്ചറിഞ്ഞത്. 

മോഷണത്തിന് ശേഷം ഒളിവില്‍ പോയ ബാബുവിനെ 12ന് രാത്രി തമ്പാനൂര്‍ റെയില്‍വേ സ്റ്റേഷനില്‍ വച്ചാണ് പള്ളിക്കല്‍ പൊലിസ് പിടികൂടിയത്. ആറ്റിങ്ങല്‍ കോടതി പ്രതിയെ റിമാന്‍ഡ് ചെയ്തു.