തിരുവനന്തപുരം: ദാരിദ്ര്യ രേഖക്ക് താഴെയുളള മത്സ്യ തൊഴിലാളികൾക്കുള്ള ഭവന നിർമാണ ഫണ്ടിൽ തിരിമറി നടത്തിയ കേസിൽ വർക്കല വെട്ടൂർ മത്സ്യ ഭവൻ ഓഫിസിലെ മുൻ ഫിഷറീസ് സബ് ഇൻസ്പെക്‌ടർ ബേബൻ. ജെ. ഫെർണാണ്ടസിനെ കോടതി വിവിധ വകുപ്പുകളിലായി അഞ്ച് വർഷം കഠിന തടവിനും 1,58,000 രൂപ പിഴക്കും ശിക്ഷിച്ചു. പ്രത്യേക വിജിലൻസ് കോടതി ജഡ്‌ജി എം.വി.രാജകുമാരയാണ്ത് വിധി പുറപ്പെടുവിച്ചത്.

അർഹരായ മത്സ്യ തൊഴിലാളികൾക്ക് 35,000 രൂപ വീതം മുന്ന് ഗഡുവായാണ് ഭവന നിർമാണത്തിനുള്ള തുക നൽകിയിരുന്നത്. ബേസ്മെന്റിന് 7,000 രൂപയും ലിന്റ്റിൽ കോൺക്രീറ്റിനു 18,000 രൂപയും അവസാന ഘട്ടത്തിൽ 10,000 രൂപ എന്ന നിരക്കിലാണ് തുക നൽകുന്നത്. ഫിഷറീസ് ഡപ്യൂട്ടി ഡയറക്‌ടറിൽനിന്ന് അർഹരായ മത്സ്യ തൊഴിലാളികളുടെ ചെക്ക് ഒപ്പിട്ടു വാങ്ങിയ ശേഷം മത്സ്യ ഭവനിലെ റജിസ്റ്ററിൽ തൊഴിലാളികളെ കൊണ്ട് ഒപ്പിടുവിച്ച് ചെക്ക് വിതരണം ചെയ്യുന്നതായിരുന്നു രീതി.

പ്രതി തൊഴിലാളികൾക്കുള്ള ചെക്ക് വാങ്ങിയ ശേഷം അത് വിതരണം ചെയ്യാതെ കബളിപ്പിക്കുകയായിരുന്നു. ചെക്ക് കൃത്യമായി ലഭിക്കാതെ വീടുപണി മുടങ്ങിയ മത്സ്യ തൊഴിലാളികൾ ഡയറക്‌ടർക്ക് പരാതി നൽകിയപ്പോഴാണ് തട്ടിപ്പ് പുറത്തു വന്നത്. ട്രഷറിയിൽ നിന്ന് ചെക്ക് മാറി പോയിരുന്നതായി വിജിലൻസ് കണ്ടെത്തിയെങ്കിലും എപ്രകാരമാണ് മത്സ്യ തൊഴിലാളികളുടെ പേരിലുളള ചെക്ക് പ്രതി മാറിയെടുത്തതെന്ന് കണ്ടെത്താൻ വിജിലൻസിനു കഴിഞ്ഞിരുന്നില്ല. സർക്കാർ ഖജനാവിന് 1,50,000 രൂപ പ്രതി നഷ്ടമുണ്ടാക്കിയെന്നാണ് വിജിലൻസ് കേസ്. വിജിലൻസിനു വേണ്ടി പബ്ലിക് പ്രോസിക്യൂട്ടർ വീണ സതീശനാണ് ഹാജരായിരുന്നത്.