സിയാറ്റില്‍:പാര്‍ക്ക് ചെയ്ത വിമാനത്തിന്റെ ചിറകിലേക്ക് ഇടിച്ചുകയറി മറ്റൊരു വിമാനം. ബുധനാഴ്ച രാവിലെ സിയാറ്റില്‍-ടക്കോമ വിമാനത്താവളത്തിലാണ് സംഭവം. ടാര്‍മാക്കിലൂടെ നീങ്ങുകയായിരുന്ന ജപ്പാന്‍ എയര്‍ലൈന്‍സ് വിമാനം പാര്‍ക്ക് ചെയ്തിരുന്ന ഡെല്‍റ്റ എയര്‍ലൈന്‍സ് വിമാനത്തില്‍ ഇടിക്കുകയായിരുന്നു. വിമാനങ്ങള്‍ക്ക് കേടുപാടുകള്‍ സംഭവിച്ചുവെങ്കിലും ആര്‍ക്കും പരുക്കില്ലെന്ന് റിപ്പോര്‍ട്ടുകള്‍ പറയുന്നു.

രാവിലെ 10.17 നാണ് അപകടം സംഭവിച്ചത്. 142 യാത്രക്കാരുമായി ഡെല്‍റ്റ 737-800 പ്യൂര്‍ട്ടോ വല്ലാര്‍ട്ടയിലേക്ക് പോകാന്‍ കാത്തിരിക്കുകയായിരുന്നു. ടോക്കിയോയില്‍ നിന്നെത്തിയ ജപ്പാന്‍ എയര്‍ലൈന്‍സ് ബോയിങ് ഡ്രീംലൈനര്‍ ലാന്‍ഡ് ചെയ്തതിന് ശേഷം ഡെല്‍റ്റ വിമാനത്തിന്റെ വാല്‍ഭാഗത്ത് ഇടിക്കുകയായിരുന്നു. 

രണ്ട് വിമാനത്തിലെയും മുഴുവന്‍ യാത്രക്കാരെയും താഴെയിറക്കിയതായും ജീവനക്കാര്‍ക്കോ യാത്രക്കാര്‍ക്കോ പരുക്കുകളൊന്നും റിപ്പോര്‍ട്ട് ചെയ്തിട്ടില്ലെന്നും വിമാനത്താവള അധികൃതര്‍ അറിയിച്ചു. അതേസമയം, സംഭവത്തെക്കുറിച്ച് അന്വേഷിക്കുമെന്ന് ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ അറിയിച്ചു.