നാഗ്പൂർ: ഇംഗ്ലണ്ടിനെതിരായ മൂന്ന് ഏകദിന മത്സരങ്ങളുടെ പരമ്പരയിലെ രണ്ടാം മത്സരം നാളെയാണ് നടക്കുന്നത്. പരമ്പരയിലെ ആദ്യ മത്സരം വിജയിച്ചതിന്റെ ആത്മവിശ്വാസവുമായിട്ടായിരിക്കും ഇന്ത്യ കളത്തിൽ ഇറങ്ങുക. എന്നാൽ രണ്ടാം മത്സരം വിജയിച്ചുകൊണ്ട് പരമ്പര സമനിലയിലാക്കാൻ ആയിരിക്കും ഇംഗ്ലണ്ട് ലക്ഷ്യം വെക്കുക. 

ആദ്യ മത്സരത്തിൽ നടത്തിയ മോശം പ്രകടനങ്ങളിൽ നിന്നും കരകയറാൻ ആയിരിക്കും ഇന്ത്യൻ നായകൻ രോഹിത് ശർമ്മ ഇറങ്ങുന്നത്. ആദ്യ മത്സരത്തിൽ വെറും രണ്ട് റൺസ് നേടിയാണ് രോഹിത് മടങ്ങിയത്. എന്നാൽ രണ്ടാം മത്സരത്തിൽ ബാറ്റിങ്ങിൽ തിളങ്ങിയത് രോഹിതിനെ കാത്തിരിക്കുന്നത് ഒരു തകർപ്പൻ റെക്കോർഡാണ്. 

ഏകദിനത്തിൽ ഏറ്റവും കൂടുതൽ റൺസ് നേടുന്ന നാലാമത്തെ ഇന്ത്യൻ താരമായി മാറാനുള്ള അവസരമാണ് രോഹിത്തിന്റെ മുന്നിലുള്ളത്. ഇന്ത്യൻ ഇതിഹാസം രാഹുൽ ദ്രാവിഡിനെ മറികടക്കാനാണ് രോഹിത്തിന് സാധിക്കുക. 22 റൺസ് കൂടി നേടിയാൽ ദ്രാവിഡിനെ മറികടന്ന് രോഹിത്തിന് നാലാം സ്ഥാനത്തേക്ക് മുന്നേറാൻ സാധിക്കും. 

ഇതിനോടകം തന്നെ 266 ഏകദിനങ്ങളിൽ നിന്ന് 10868 റൺസാണ് രോഹിത് നേടിയിട്ടുള്ളത്. 31 സെഞ്ച്വറികളും 57 അർദ്ധ സെഞ്ച്വറികളും മൂന്ന് ഇരട്ട സെഞ്ച്വറികളും ആണ് രോഹിത് വൈറ്റ് ബോൾ ക്രിക്കറ്റിൽ നേടിയത്. ദ്രാവിഡ് 344 ഏകദിനങ്ങളിൽ നിന്ന് 10889 റൺസാണ് നേടിയിട്ടുള്ളത്. 12 സെഞ്ച്വറികളും 83 അർദ്ധ സെഞ്ച്വറികളും ആണ് ദ്രാവിഡ് നേടിയത്. 463 ഏകദിനങ്ങളിൽ നിന്ന് 18426 റൺസ് നേടിയ സച്ചിൻ ടെണ്ടുൽക്കറാണ് ഈ പട്ടികയിൽ ഒന്നാം സ്ഥാനത്തുള്ളത്. 13906 റൺസുമായി വിരാട് കോഹ്‌ലി രണ്ടാം സ്ഥാനത്തും 11363 റൺസ് നേടിയ സൗരവ് ഗാംഗുലി മൂന്നാം സ്ഥാനത്തുമാണ് ഉള്ളത്.