തിരൂർ: പൊതു വിദ്യാലയങ്ങളിലെ കായികാധ്യാപകരുടെ എണ്ണം എത്രയെന്ന് അറിയില്ലെന്ന് സർക്കാർ. വിവരാവകാശ അപേക്ഷക്കുള്ള മറുപടിയിലാണ് പൊതുവിദ്യാഭ്യാസ ഡയറക്ടറുടെ കാര്യാലയം ഇക്കാരം വ്യക്തമാക്കിയത്. ആവശ്യപ്പെട്ട വിവരങ്ങൾ  ഈ കാര്യാലയത്തിൽ ക്രോഡീകരിച്ചിട്ടില്ല എന്ന വിചിത്രമറുപടിയാണ് അധികൃതർ നൽകിയത്. എന്നാൽ ശമ്പള വിതരണത്തിനും മറ്റുമായി സമ്പൂർണ സോഫ്റ്റ് വെയർ അപ്ഡേഷനിലൂടെയും ഗൂഗിൾഫോം വഴിയും ഈ ഡാറ്റ സർക്കാർ ശേഖരിക്കാറുണ്ട്.

എയ്ഡഡ്, സർക്കാർ മേഖലയിലെ അപ്പർ പ്രൈമറി, ഹൈസ്കൂൾ വിഭാഗങ്ങളിൽ ജോലി ചെയ്യുന്ന കായികാധ്യാപകരുടെ എണ്ണം മലപ്പുറം ജില്ലയിലെ പരീക്ഷാർഥിയാണ് ചോദിച്ചത്.  വിദ്യാലയങ്ങളിലെ ആറാം പ്രവർത്തിദിനത്തിലെ കണക്കെടുപ്പോടെ അധ്യയന വർഷത്തെ തസ്തികകളുടെ എണ്ണം സർക്കാർ നിജപ്പെടുത്താറുണ്ട്. കുട്ടികളുടെ എണ്ണക്കുറവിനനുസരിച്ച് തസ്തിക നഷ്ടപ്പെട്ട അധ്യാപകരിൽ സംരക്ഷണാനുകൂല്യമുള്ളവരെ വിവിധ ഇടങ്ങളിൽ സംരക്ഷിച്ച് മറ്റുള്ളവർ സർവിസിൽ നിന്ന് പുറത്താകുകയുമാണ് പതിവ്.

ഇത് പ്രകാരം നിരവധി തസ്തികകൾ ഈ വർഷവും നഷ്ടപ്പെട്ടിരുന്നു. ഇതോടെ പി.എസ്.സി പരീക്ഷ എഴുതി കാത്തിരുന്നവരുടെ പ്രതീക്ഷയ്ക്ക് മങ്ങലേറ്റിറ്റുണ്ട്. യു.പി വിഭാഗത്തിൽ 500 കുട്ടികളും ഹൈസ്കൂളിൽ 9,10 ക്ലാസുകളിലായി അഞ്ച് പിരീഡും ഉണ്ടെങ്കിലേ ആ വിദ്യാലയത്തിൽ കായികാധ്യാപക തസ്തിക അനുവദിക്കുകയുള്ളു. ഇതുമൂലം 2739  യു.പി സ്കൂളുകളിലായി 394 കായികാധ്യാപകരും 2663 ഹൈസ്കൂളുകളിൽ 1475  കായികാധ്യാപകരും മാത്രമാണുള്ളത് എന്നതാണ് അനൗദ്യോഗിക കണക്ക്.