ബെംഗളൂരു: കെംപെഗൗഡ രാജ്യാന്തര വിമാനത്താവളത്തിൽ ഡ്രോൺ ആക്രമണ ഭീഷണി. ഇ-മെയിൽ വഴിയാണ് ഭീഷണി സന്ദേശമെത്തിയത്. ബെംഗളൂരുവിൽനിന്ന് ചെന്നൈ, കേരളം എന്നിവിടങ്ങളിലേക്ക് പുറപ്പെടുന്ന വിമാനങ്ങളെ ലക്ഷ്യമിട്ട് ഡ്രോൺ ആക്രമണം നടത്താൻ സാധ്യതയുണ്ടെന്നായിരുന്നു സന്ദേശം.

മുൻ മുഖ്യമന്ത്രി ബസവരാജ് ബൊമ്മയുടെ പേര് പരാമർശിച്ചായിരുന്നു വിമാനത്താവളത്തിലേക്ക് ഇ-മെയിൽ സന്ദേശം ലഭിച്ചത്. അധികൃതർ ഉടൻതന്നെ പൊലിസിൽ വിവരം അറിയിച്ചു. തുടർന്ന്, പൊലീസും ബോംബ് സ്ക്വാഡ് ഉൾപ്പെടെയുള്ളവർ സ്ഥലത്തെത്തി പരിശോധന നടത്തിയെങ്കിലും സംശയാസ്‌പദമായ ഒന്നും കണ്ടെത്താനായില്ല.

ഭീഷണി വ്യാജമാണെന്ന് പൊലിസ് സ്ഥിരീകരിച്ചു. [email protected] എന്ന ഇമെയിൽ വിലാസത്തിൽനിന്നാണ് ഭീഷണി സന്ദേശം അയച്ചത്. മുൻ മുഖ്യമന്ത്രി ബസവരാജ് ബൊമ്മക്ക് നേരത്തെ ഒരു കത്ത് അയച്ചിരുന്നുവെന്നും ഇതിന് മറുപടി ലഭിച്ചില്ലെങ്കിൽ വിമാനങ്ങൾക്ക് നേരെ ഡ്രോൺ ആക്രമണം ഉണ്ടാകുമെന്നുമായിരുന്നു സന്ദേശം. സംഭവത്തിൽ എയർപോർട്ട് പൊലിസ് കേസെടുത്തു.

Bengaluru's Kempegowda International Airport has received a threat of a drone attack through an email, prompting airport authorities to heighten security measures.