ദുബൈ: മാര്‍ച്ച് 1 ന് ആരംഭിക്കുന്ന വിശുദ്ധ റമദാനിന്റെ തുടക്കത്തില്‍ ഒരു പുതിയ വിഭാഗം കൂടി തുറക്കാന്‍ ഒരുങ്ങുകയാണ് എമിറേറ്റിലെ ഏറ്റവും വലിയ ഷോപ്പിംഗ് മാളായ ദുബൈ മാള്‍.

എമ്മാര്‍ പ്രോപ്പര്‍ട്ടീസിന്റെ സ്ഥാപകനായ മുഹമ്മദ് അലബ്ബാറാണ് ഇതു സംബന്ധിച്ച പ്രഖ്യാപനം നടത്തിയത്. പുതിയ വിഭാഗത്തില്‍ 65 എക്‌സ്‌ക്ലൂസീവ് ബ്രാന്‍ഡുകളും എഫ് & ബി ഔട്ട്‌ലെറ്റുകളും ഉള്‍പ്പെടുത്തുമെന്ന് അദ്ദേഹം കൂട്ടിച്ചേര്‍ത്തു. 2024 ജൂണില്‍ എമ്മാര്‍ പ്രോപ്പര്‍ട്ടീസ് ദുബൈ മാളില്‍ 1.5 ബില്യണ്‍ ദിര്‍ഹത്തിന്റെ വലിയ വിപുലീകരണം പ്രഖ്യാപിച്ചിരുന്നു. ഇതില്‍ 240 പുതിയ ആഡംബര സ്റ്റോറുകളും ഭക്ഷണ, പാനീയ ഔട്ട്‌ലെറ്റുകളും ഉള്‍പ്പെടും. 

2023ല്‍ ഭൂമിയില്‍ ഏറ്റവുമധികം ആളുകള്‍ സന്ദര്‍ശിച്ച സ്ഥലമായി ദുബൈ മാള്‍ തിരഞ്ഞെടുക്കപ്പെട്ടിരുന്നു. 105 ദശലക്ഷം സന്ദര്‍ശകരുമായി റെക്കോര്‍ഡ് നേട്ടമാണ് ദുബൈ മാള്‍ 2023ല്‍ കൈവരിച്ചത്. മുന്‍ വര്‍ഷത്തേക്കാള്‍ 19 ശതമാനം വര്‍ധനവാണ് ആ വര്‍ഷം ഉണ്ടായത്.

ലോകത്തിലെ രണ്ടാമത്തെ വലിയ ഷോപ്പിംഗ് മാളാണ് ദുബൈ മാള്‍. നിലവില്‍, 1.2 ദശലക്ഷം ചതുരശ്ര മീറ്റര്‍ വിസ്തൃതിയുള്ള ഈ മാളില്‍ 1,200ലധികം റീട്ടെയില്‍ ഔട്ട്‌ലെറ്റുകള്‍ ഉണ്ട്.

Dubai Mall to open 65 new stores at the start of Ramadan