മുംബൈ: പൂനെയിലെ ബസ് ഡിപ്പോയ്ക്കുള്ളിൽ ബസ് കാത്തുനിന്ന 26 കാരിയെ ആളൊഴിഞ്ഞ ബസിലേക്ക് വിളിച്ചുകൊണ്ടുപോയി ക്രൂരമായി പീഡിപ്പിച്ചു. ബുധനാഴ്ച പുലർച്ചെ 5.30നാണ് സ്വർഗേറ്റ് ബസ് സ്റ്റാന്റിൽ വെച്ച് യുവതി പീഡനത്തിനിരയായത്.

സംഭവസ്ഥലത്തുനിന്ന് വെറും 100 മീറ്റർ അകലെ പൊലീസ് സ്റ്റേഷൻ ഉണ്ടായിട്ടും അതിക്രമം നടന്നു. ദത്താത്രേയ് രാംദാസ് ഗാഡേ എന്നയാളാണ് യുവതിയെ പീഡിപ്പിച്ചതെന്ന് തിരിച്ചറിഞ്ഞിട്ടുണ്ട്. എന്നാൽ, ഇയാളെ പിടികൂടാനായിട്ടില്ല.

പുലർച്ചെ സ്വന്തം വീടിലേക്ക് പോകാൻ ബസ് സ്റ്റാന്റിൽ എത്തിയ യുവതിയെ പ്രതി കബളിപ്പിച്ചു. പോകേണ്ട ബസ് മറ്റൊരു ഭാഗത്ത് നിർത്തിയിട്ടിരിക്കുകയാണെന്ന് പറഞ്ഞ് അവിടേക്ക് കൂട്ടിക്കൊണ്ടുപോയ പ്രതി, സ്ത്രീയെ സംസ്ഥാന ട്രാൻസ്പോർട്ട് കോർപറേഷന്റെ ശിവശാഹി ബസിൽ കയറാൻ നിർബന്ധിച്ചു. ബസിനുള്ളിൽ പ്രവേശിച്ച ഉടൻ ഇയാൾ ബലാത്സംഗം ചെയ്യുകയായിരുന്നു.

സംഭവം പുറത്തറിഞ്ഞതോടെ പൊലീസ് സിസിടിവി ദൃശ്യങ്ങൾ പരിശോധിച്ച് പ്രതിയെ തിരിച്ചറിഞ്ഞു. പ്രതിക്കായി എട്ട് അന്വേഷണസംഘങ്ങൾ രൂപീകരിച്ചിട്ടുണ്ടെന്ന് പൊലീസ് അറിയിച്ചു.

പീഡനത്തിനിരയായ യുവതിയുടെ ആരോഗ്യനില നിലവിൽ തൃപ്തികരമാണെന്ന് പൊലീസ് സ്ഥിരീകരിച്ചു. സംഭവം വലിയ പ്രതിഷേധങ്ങൾക്കും വഴിയോരുക്കി. മഹാരാഷ്ട്ര ഉപമുഖ്യമന്ത്രി അജിത് പവാർ കൃത്യത്തിന് ശക്തമായ ഭാഷയിൽ പ്രതികരിച്ചു. "അത്യന്തം അപമാനകരമായ സംഭവമാണിത്. ഈ കുറ്റവാളിക്ക് വധശിക്ഷയിൽ താഴെയുള്ള ശിക്ഷയൊന്നും അർഹിക്കുന്നില്ലെന്നും ,"പവാർ പറഞ്ഞു, അന്വേഷണത്തിന് മേൽനോട്ടം വഹിക്കാൻ പൂനെ പൊലീസ് കമ്മീഷണറെ നിർദേശിച്ചതായും അറിയിച്ചു.