കുവൈത്ത് സിറ്റി: കുവൈത്തിൽ സർക്കാർ മേഖലയിൽ ജോലി ചെയ്യുന്നവർക്ക് ഇനിയൊരു തടസവും ഇല്ലാതെ സ്വകാര്യമേഖലയിലേക്ക് ഇഖാമ മാറ്റാൻ അനുമതി ലഭിക്കും. ആഭ്യന്തര മന്ത്രാലയത്തിന് കീഴിലുള്ള ജനറൽ അഡ്മിനിസ്ട്രേഷൻ ഓഫ് റസിഡൻസി അഫേഴ്സ് വിഭാഗം ഇതുമായി ബന്ധപ്പെട്ട നിയന്ത്രണം നീക്കിയതായി അറിയിച്ചു. പുതിയ തീരുമാനപ്രകാരം, ആർട്ടിക്കിൾ 17 വീസയിൽ സർക്കാർ മേഖലയിൽ ജോലി ചെയ്യുന്നവർക്ക് സ്വകാര്യ കമ്പനികളിലേക്ക് മാറാൻ അനുമതി ലഭിക്കും.

കുവൈത്തിൽ ഇനി സ്വകാര്യമേഖലയിൽ ജോലി ചെയ്യുന്നവർക്ക് സർക്കാർ മേഖലയിക്ക് മാറാനും അനുമതി ലഭിക്കും. പുതിയ തീരുമാനപ്രകാരം, ഇഖാമ മാറ്റത്തിന് ഇനി മുതൽ വിദ്യാഭ്യാസ യോഗ്യത തടസ്സമാവില്ല. മുൻപ്, ജോലി ചെയ്യുന്ന മേഖലയുമായി ബന്ധപ്പെട്ട വിദ്യാഭ്യാസ യോഗ്യത ആവശ്യമായിരുന്നുവെങ്കിലും ഇപ്പോൾ ഈ വ്യവസ്ഥ ഒഴിവാക്കിയിട്ടുണ്ട്. രാജ്യത്ത് തൊഴിലാളി ക്ഷാമം പരിഹരിക്കാൻ നിരവധി പരിഷ്‌കരണങ്ങളാണ് ഭരണകൂടം നടപ്പിലാക്കുന്നത്.

കഴിഞ്ഞ ഡിസംബർ ആരംഭത്തിൽ, യൂണിവേഴ്‌സിറ്റി ബിരുദം ഇല്ലാത്ത 60 വയസ് കഴിഞ്ഞ വിദേശികൾക്ക് വീസ പുതുക്കുന്നതിനുള്ള നിയന്ത്രണം പിൻവലിച്ച് പബ്ലിക് അതോറിറ്റി ഫോർ മാൻപവർ (PAM) ഉത്തരവ് പുറപ്പെടുവിച്ചിരുന്നു. 2021 ജനുവരി 1 മുതൽ നിലവിലുണ്ടായിരുന്ന നിയന്ത്രണം കുവൈത്ത് ആഭ്യന്തരമന്ത്രി ഷെയ്ഖ് ഫഹദ് യൂസഫ് സഊദ് അൽ സബാഹിന്റെ നിർദേശത്തെ തുടർന്ന് റദ്ദാക്കുകയായിരുന്നു.

നിയന്ത്രണ തീരുമാനത്തിന്റെ അടിസ്ഥാനത്തിൽ, 60 വയസ്സ് കഴിഞ്ഞ വിദേശികൾക്ക് പ്രതിവർഷം ഏകദേശം 1000 ദിനാറോളം അധിക ചെലവ് വന്നിരുന്നു. വാർഷിക ആരോഗ്യ ഇൻഷുറൻസ് പോളിസിക്ക് കെഡി 500, വർക്ക് പെർമിറ്റിന് കെഡി 250 എന്നിവക്കൊപ്പം മറ്റ് അനുബന്ധ ചെലവുകളും ചേർന്നത് വലിയ സാമ്പത്തിക ബാധ്യതയായി. ഇതിന്റെ പ്രത്യാഘാതമായി മലയാളികൾ ഉൾപ്പെടെയുള്ള നിരവധി പരിചയസമ്പന്നർ ഈ കാലയളവിൽ കുവൈത്ത് വിടേണ്ടി വന്നിരുന്നു. ഇത്, രാജ്യത്തെ തൊഴിൽ മേഖലയെ പ്രതികൂലമായി ബാധിക്കുന്നതിനാൽ, ഈ തീരുമാനം പുനപരിശോധിക്കാൻ പബ്ലിക് അതോറിറ്റി ഫോർ മാൻപവറിന് മന്ത്രി നിർദേശം നൽകിയിരുന്നു. 

Kuwait has introduced a significant reform, permitting expatriates to switch jobs between the government and private sectors, providing them with greater flexibility and career growth opportunities.