കൊച്ചി: കഞ്ചാവ് കടത്തുമായി ബന്ധപ്പെട്ട് യുവതി ഉൾപ്പെടെ രണ്ട് പേർ റൂറൽ ജില്ലാ ഡാൻസാഫ് ടീമിന്റെയും ആലുവ പോലീസിന്റെയും പരിശോധനയിൽ പിടിയിലായി. തൊടുപുഴ കാരിക്കോട് കുമ്മൻകല്ല് തൊട്ടിയിലച്ചൻ റസൽ (40), തൃക്കാക്കര എൻ.ജി.ഒ ക്വാർട്ടേഴ്സ് പരിസരത്ത് താമസിക്കുന്ന നീന (45) എന്നിവരാണ് അറസ്റ്റിലായത്.

ആലുവ എസ്.എൻ പുരം ഭാഗത്തെ താമസ സ്ഥലത്തുനിന്നാണ് രണ്ട്കിലോയോളം കഞ്ചാവ് പിടിച്ചെടുത്തത്. പ്രതികൾ ഒഡീഷയിൽ നിന്ന് കിലോയ്ക്ക് 5000 രൂപയ്ക്ക് വാങ്ങി 25000 രൂപയ്ക്ക് ഹോൾസെയിൽ വില്പന നടത്തുകയായിരുന്നു.

റസലിനെതിരെ നേരത്തെയും മയക്കുമരുന്ന് കേസുകൾ ഉൾപ്പെടെ നിരവധി കേസുകൾ ഉള്ളതായി അന്വേഷണ സംഘം അറിയിച്ചു. പ്രതിക്കെതിരെ കല്ലൂർക്കാട്, മൂവാറ്റുപുഴ, കാഞ്ഞാർ, പെരുമ്പാവൂർ പൊലീസ് സ്റ്റേഷനുകളിൽ കേസുകൾ നിലവിലുണ്ട്. അന്വേഷണത്തിന്റെ ഭാഗമായി കൂടുതൽ അറസ്റ്റ് ഉണ്ടാകാമെന്ന് ഡി.വൈ.എസ്.പി ടി.ആർ രാജേഷ് അറിയിച്ചു.