ഡൽഹി: ഡൽഹിയിലെ ജാമിയ മിലിയ സർവകലാശാലയുടെ പ്രവേശന പരീക്ഷയ്ക്കുള്ള കേന്ദ്രങ്ങളിൽ നിന്ന് തിരുവനന്തപുരത്തെ ഒഴിവാക്കിയതിനെതിരെ പ്രതിഷേധം ശക്തമാകുന്നു. ദക്ഷിണേന്ത്യയിൽ ഏക പരീക്ഷാ കേന്ദ്രമായിരുന്ന തിരുവനന്തപുരത്തെ ഒഴിവാക്കിയ തീരുമാനം അം​ഗീകരിക്കാനാകില്ലെന്നും നിയമപരമായ നടപടികൾ സ്വീകരിക്കുമെന്നും എം.എസ്.എഫ്. വ്യക്തമാക്കിയിട്ടുണ്ട്.

പരീക്ഷാ കേന്ദ്രം പുനഃസ്ഥാപിക്കണമെന്ന് ആവശ്യപ്പെട്ട് എംപിമാരായ ശശി തരൂർ, ഹാരീസ് ബീരാൻ എന്നിവർ രംഗത്തെത്തി. ജാമിയ സർവകലാശാല വൈസ് ചാൻസലറിന് ഹാരീസ് ബീരാൻ എം.പി. കത്ത് നൽകി. ഇതുവഴി രണ്ടായിരത്തിലധികം വിദ്യാർത്ഥികൾ ദുരിതത്തിലാകുമെന്ന് കത്തിൽ വ്യക്തമാക്കിയ അദ്ദേഹം, മറ്റ് സംസ്ഥാനങ്ങളിലേക്ക് മാറ്റിയ ഈ തീരുമാനം പുനപരിശോധിക്കണമെന്നും ആവശ്യപ്പെട്ടു.