ദുബായ്: നാളെ നടക്കുന്ന ഐസിസി ചാമ്പ്യൻസ് ട്രോഫി ഫൈനലിൽ ഇന്ത്യൻ ടീമിലെ നിർണായകമായ താരമാവുക ആരാണെന്ന് പറയുകയാണ് മുൻ ഇന്ത്യൻ സ്പിന്നർ ആർ അശ്വിൻ. ഫൈനൽ മത്സരത്തിൽ ന്യൂസിലാൻഡിനെതിരെ കളി മാറ്റിമറിക്കാൻ ശ്രെയസ് അയ്യർക്ക് സാധിക്കുമെന്നാണ് അശ്വിൻ പറഞ്ഞത്. 

'എനിക്ക് തോന്നുന്നു ഫൈനലിൽ ഇന്ത്യയുടെ കളി മാറ്റിമറിക്കുന്നയാൾ ശ്രേയസ് അയ്യർ ആയിരിക്കും. അദ്ദേഹത്തിന്റെ സമീപകാലത്തെ പ്രകടനങ്ങൾ നോക്കിയാണ് ഞാൻ ഇത് പറയുന്നത്. 2023 ലോകകപ്പിൽ അയ്യർ മികച്ച പ്രകടനമാണ് നടത്തിയത്. ന്യൂസിലാൻഡിനെതിരെയും അദ്ദേഹം മികച്ച പ്രകടനം നടത്തി, അതുകൊണ്ട് ഫൈനലിൽ ഒരിക്കൽ കൂടി നമുക്കത് കാണാൻ കഴിയും. ഷോർട്ട് ബോൾ നേരിടുന്നതിലും അദ്ദേഹം മികച്ചതായി. എന്നാൽ കഴിഞ്ഞ മത്സരത്തിൽ അദ്ദേഹം പുറത്തായത് അങ്ങനെയാണ്. പക്ഷെ അത് പ്രശ്നമാക്കേണ്ടതില്ല. തനിക്ക് കഴിവ് കുറഞ്ഞ കാര്യങ്ങൾ അദ്ദേഹം എപ്പോഴും മെച്ചപ്പെടുത്താൻ ആഗ്രഹിക്കുന്നു,' അശ്വിൻ തന്റെ യുട്യൂബ് ചാനലിലൂടെ പറഞ്ഞു. 

ടൂർണമെന്റിൽ ഇന്ത്യയുടെ നാലാം നമ്പറിൽ മിന്നും ഫോമിലാണ് അയ്യർ കളിച്ചുകൊണ്ടിരിക്കുന്നത്. ഇതിനോടകം തന്നെ നാല് മത്സരങ്ങളിൽ നിന്നും 195 റൺസാണ് അയ്യർ നേടിയിട്ടുള്ളത്. ഫൈനലിലും താരം മിന്നും പ്രകടനം നടത്തുമെന്ന് തന്നെയാണ് ആരാധകർ പ്രതീക്ഷിക്കുന്നത്. 

ഫൈനലിൽ മൂന്നാം ഐസിസി ചാമ്പ്യൻസ് ട്രോഫി കിരീടം സ്വന്തമാക്കാനിയിരിക്കും രോഹിത് ശർമയും സംഘവും കിവീസിനെനെതിരെ കളത്തിലിറങ്ങുന്നത്. മറുഭാഗത്ത് രണ്ടാം ചാമ്പ്യൻസ് ട്രോഫി കിരീടം ലക്ഷ്യം വെച്ചായിരിക്കും ന്യൂസിലാൻഡ് ഇറങ്ങുക. നീണ്ട 25 വർഷങ്ങൾക്ക് ശേഷമാണ് ഇരു ടീമുകളും ഐസിസിയുടെ ഒരു ഏകദിന ടൂർണമെന്റിൽ ഫൈനലിൽ ഏറ്റുമുട്ടുന്നത്. ഇതിനുമുമ്പ് 2000ത്തിലാണ് ഇന്ത്യയും ന്യൂസിലാൻഡും ഫൈനലിൽ ഏറ്റുമുട്ടിയിരുന്നത്. ആ മത്സരത്തിൽ ഇന്ത്യയെ പരാജയപ്പെടുത്തി കിവീസ് ആയിരുന്നു കിരീടം സ്വന്തമാക്കിയിരുന്നത്. 

ടൂർണമെന്റിൽ സവാധിപത്യത്തോടെയാണ് ഇന്ത്യ ഫൈനലിലേക്ക് മുന്നേറിയത്. ഗ്രൂപ്പ് ഘട്ടത്തിൽ മൂന്നു മത്സരങ്ങളും വിജയിച്ചുകൊണ്ട് ചാമ്പ്യന്മാരാണ് ഇന്ത്യ സെമിയിൽ എത്തിയത്. സെമിയിൽ ഓസ്ട്രേലിയയെ തകർത്താണ് ഇന്ത്യ ഫൈനൽ യോഗ്യത ഉറപ്പിച്ചത്. എന്നാൽ മറുഭാഗത്ത് ഗ്രൂപ്പ് രണ്ടാം സ്ഥാനം സ്വന്തമാക്കിയാണ് കിവീസ് സെമിയിലേക്ക് മുന്നേറിയത്. സെമിഫൈനലിൽ സൗത്ത് ആഫ്രിക്കയെ പരാജയപ്പെടുത്തിയാണ് മിച്ചൽ സാന്റ്നറും സംഘവും കലാശ പോരാട്ടത്തിലേക്ക് മുന്നേറിയത്.

R Ashwin Talks About Shreyas iyer Performance In ICC Champions Trophy 2025