കൊച്ചി: കളമശേരി പോളിടെക്നിക് കോളജ് ഹോസ്റ്റലിൽ കഞ്ചാവ് ഇടപാട് നടക്കുന്നതിന്റെ നിർണായക വിവരങ്ങൾ പൊലീസിന് ലഭിച്ചത് വാട്സ്ആപ്പ് ഗ്രൂപ്പിൽ നിന്ന്. ഹോളി ആഘോഷത്തിനായി കഞ്ചാവ് ശേഖരിക്കാൻ വിദ്യാർഥികൾ രൂപീകരിച്ച വാട്സ്ആപ്പ് ഗ്രൂപ്പിൽ സ്പെഷ്യൽ ബ്രാഞ്ച് നുഴഞ്ഞുകയറി വിവരങ്ങൾ ശേഖരിച്ചതാണ് കേസിന്റെ തുമ്പ് നൽകിയത്.

‘ഹോളി നമുക്ക് പൊളിക്കണം’ എന്ന സന്ദേശത്തോടെയാണ് ഒരു സംഘം വിദ്യാർഥികൾ വാട്സ്ആപ്പ് ഗ്രൂപ്പ് ആരംഭിച്ചത്. പെരിയാർ ഹോസ്റ്റലിലെ ചില വിദ്യാർഥികളുടെ നേതൃത്വത്തിൽ കഞ്ചാവ് പിരിവ് എളുപ്പമാക്കാനായിരുന്നു ഈ നീക്കം. 5 ഗ്രാം കഞ്ചാവിന് 500 രൂപ എന്ന നിരക്കിൽ ചില്ലറ വിൽപ്പനയ്ക്ക് വില നിശ്ചയിച്ചു. ഇതിനിടെ, ഗ്രൂപ്പിന്റെ പ്രവർത്തനം സ്പെഷ്യൽ ബ്രാഞ്ചിന്റെ ശ്രദ്ധയിൽപ്പെടുകയും അവർ ഗ്രൂപ്പിൽ ചേർന്ന് ചാറ്റുകൾ ചോർത്തുകയും ചെയ്തു.

കഞ്ചാവ് എപ്പോൾ, ഏത് മുറിയിൽ എത്തുമെന്ന വിവരം വരെ പൊലീസിന് ലഭിച്ചു. വ്യാഴാഴ്ച ജി-11 എന്ന മുറിയിൽ കഞ്ചാവ് എത്തിയെന്ന സന്ദേശം ഗ്രൂപ്പിൽ വന്നതോടെ പൊലീസ് നീക്കം തുടങ്ങി. ഈ മുറിയിൽ താമസിക്കുന്ന എം. ആകാശ് എന്ന വിദ്യാർഥി ഏകദേശം 2 കിലോ കഞ്ചാവ് സൂക്ഷിക്കുകയും ചില്ലറ വിൽപ്പന നടത്തുകയും ചെയ്തതായി പൊലീസിന് വിവരം ലഭിച്ചു. സ്പെഷ്യൽ ബ്രാഞ്ച് ശേഖരിച്ച വിവരങ്ങൾ ഡാൻസാഫ് സംഘത്തിന് കൈമാറി. കോളജ് പ്രിൻസിപ്പലിന്റെ രേഖാമൂലമുള്ള അനുമതിയോടെ ഹോസ്റ്റൽ മുറിയിൽ റെയ്ഡ് നടത്തി. പരിശോധനയുടെ മുഴുവൻ നടപടികളും വീഡിയോയിൽ പകർത്തി.

പരിശോധനയ്ക്കിടെ, ആകാശിന്റെ ഫോണിലേക്ക് “സാധനം സേഫ് അല്ലേ?” എന്ന് തിരക്കുന്ന കോൾ വന്നു. ഇതോടെ, കഞ്ചാവ് ഇടപാടിൽ ആകാശിന് നിർണായക പങ്കുണ്ടെന്ന് പൊലീസ് ഉറപ്പിച്ചു. ആകാശിന്റെ ഫോൺ കോളുകൾ കേന്ദ്രീകരിച്ച് മുൻപ് ലഹരി ഇടപാടുകൾ നടത്തിയിട്ടുണ്ടോ, കൂടുതൽ പേർ ഉൾപ്പെട്ടിട്ടുണ്ടോ എന്നും പൊലീസ് അന്വേഷിക്കും.