കോഴിക്കോട്: പ്രമുഖ വ്യവസായിയും സിനിമ നിര്‍മാതാവുമായ ഗോകുലം ഗോപാലനെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇ.ഡി) ചോദ്യംചെയ്യുന്നു. കോഴിക്കോട്ടെ ഗോകുലം ഗ്രൂപ്പിന്റെ ഓഫിസില്‍ വെച്ചാണ് ചോദ്യം ചെയ്യല്‍. കൊച്ചിയില്‍ നിന്നുള്ള ഉദ്യോഗസ്ഥരാണ് ഇദ്ദേഹത്തെ ചോദ്യംചെയ്യുന്നത്.

ഗോകുലം ഗ്രൂപ്പിന്റെ ഓഫിസുകളില്‍ റെയ്ഡ് നടത്തുന്നതിനിടെയാണ് ചോദ്യം ചെയ്യലും പുരോഗമിക്കുന്നത്. ചോദ്യം ചെയ്യലിനായി വടകരയിലെ വീട്ടിലെത്താനായിരുന്നു ഇ.ഡിയുടെ നീക്കം. എന്നാല്‍ ഗോകുലം ഗോപാലന്‍ കോഴിക്കോടെട ഓഫിസിലേക്ക് എത്തുകയായിരുന്നു. 

ചെന്നൈ കോടമ്പാക്കത്തുള്ള ഗോകുലം ധനകാര്യ സ്ഥാപനങ്ങളിലും കോഴിക്കോട് അരയിടത്തുപാലത്തുള്ള ഗോകുലം ഗ്രാന്റ് കോര്‍പ്പറേറ്റ് ഓഫിസിലുമാണ് ഇ.ഡി റെയ്ഡ് നടക്കുന്നത്. ചിട്ടി ഇടപാടിന്റെ പേരില്‍ ഫെമ നിയമ ലംഘനം നടത്തി എന്ന ആരോപണത്തിലാണ് പരിശോധന നടത്തുന്നത്.

ഏറെ വിവാദങ്ങള്‍ക്കിടയാക്കിയ എമ്പുരാന്‍ സിനിമയുടെ നിര്‍മാതാക്കളില്‍ ഒരാളാണ് ഗോകുലം ഗോപാലന്‍. സിനിമ ദേശീയതലത്തില്‍ തന്നെ ഏറെ ചര്‍ച്ചകള്‍ക്കിടയാക്കിയ അവസരത്തിലാണ് റെയ്ഡ് നടക്കുന്നത് ഗുജറാത്ത് വംശഹത്യയെ സൂചിപ്പിക്കുന്ന രംഗങ്ങള്‍ ഹിന്ദുത്വവാദികളെ പ്രകോപിപ്പിച്ചിരുന്നു. പിന്നാലെ മോഹന്‍ലാല്‍ ഉള്‍പെടെ സിനിമയിലുള്ളവര്‍ മാപ്പ് പറഞ്ഞ് രംഗത്തെത്തി.  തിയറ്ററില്‍ പ്രദര്‍ശനം തുടങ്ങിയ ചിത്രം വീണ്ടും സെന്‍സര്‍ ചെയ്ത് ചില ഭാഗങ്ങള്‍ വെട്ടിമാറ്റിശേഷമാണ് വീണ്ടും പ്രദര്‍ശനം നടക്കുന്നത്.