പാലക്കാട്: മുണ്ടൂരില്‍ കാട്ടാനയുടെ ആക്രമണത്തില്‍ മരിച്ച അലന്റെ സംസ്‌ക്കാരം ഇന്ന്. രാവിലെ എട്ടുമണിയോടെ പാലക്കാട്ടെ സ്വകാര്യ ആശുപത്രിയില്‍ നിന്നും മൃതദേഹം വീട്ടിലേക്ക് കൊണ്ടുപോകുമെന്നാണ് പറഞ്ഞിരുന്നത്.  മൈലംപുള്ളിയിലെ സെമിത്തേരിയിലാണ് സംസ്‌ക്കാരം. നെഞ്ചിലേറ്റ ആഴത്തിലുള്ള മുറിവാണ് അലന്റെ മരണകാരണമായതെന്നാണ് പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നത്.

അലന്റെ അമ്മ വിജി പരിക്കുകളോടെ തൃശൂര്‍ മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുകയാണ്. കഴിഞ്ഞ ഒരാഴ്ചയായി മുണ്ടൂരിലും സമീപപ്രദേശങ്ങളിലും കാട്ടാനകള്‍ നിലയുറപ്പിച്ചിരിക്കുകയാണ്. ഇതേ ആനക്കൂട്ടത്തിന് മുന്നിലാണ് ഇന്നലെ അലനും അമ്മ വിജിയും അകപ്പെട്ടത്. വൈകിട്ട് കടയില്‍നിന്ന് സാധനങ്ങള്‍ വാങ്ങി വീട്ടിലേക്ക് മടങ്ങുന്നതിനിടെയാണ് ആക്രമണം ഉണ്ടായത്. മുന്നില്‍പ്പെട്ട അലനെ ആന തുമ്പിക്കൈകൊണ്ട് തട്ടിയും കാലുകൊണ്ട് തൊഴിച്ചും ആക്രമിച്ചു. പിന്നാലെ വന്ന അമ്മ വിജിയെയും ആനക്കൂട്ടം ആക്രമിച്ചു. പരിക്കേറ്റ വിജി കയ്യില്‍ കരുതിയിരുന്ന ഫോണ്‍ വഴി വിവരം അറിയിച്ചതിനെ തുടര്‍ന്ന് നാട്ടുകാര്‍ സ്ഥലത്തെത്തി. എന്നാല്‍, ആശുപത്രിയിലെത്തുന്നതിന് മുമ്പ് ഗുരുതരമായി പരിക്കേറ്റ് രക്തത്തില്‍ കുളിച്ച അലന്‍ മരണപ്പെട്ടിരുന്നു. തോളെല്ലിനും ശരീരത്തിന്റെ വലതുഭാഗത്തും പരിക്കേറ്റ വിജി തൃശൂര്‍ മെഡിക്കല്‍ കോളേജില്‍ ചികിത്സയില്‍ തുടരുകയാണ്.

 
ദിവസങ്ങളായി മേഖലയില്‍ മൂന്ന് കാട്ടാനകള്‍ നിലയുറപ്പിച്ചിരുന്നുവെന്നും ഇതേ കുറിച്ച് വനംവകുപ്പ് നാട്ടുകാര്‍ക്ക് കൃത്യമായ വിവരം നല്‍കിയില്ലെന്നും ആരോപണമുയരുന്നുണ്ട്.