കൊച്ചി: അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച വിദേശത്തുനിന്നുള്ള ഇറക്കുമതിക്കുള്ള വ്യാപാര ചുങ്കം കേരളത്തിന്റെ മത്സ്യ സംസ്‌കരണ കയറ്റുമതി മേഖലയ്ക്കും തിരിച്ചടിയാകും. മറ്റു കയറ്റുമതി ഇനങ്ങളോടൊപ്പം ചെമ്മീനിനുൾപ്പെടെ ഇന്ത്യയിൽ നിന്നുള്ള സമുദ്രോൽപന്നങ്ങൾക്കും 26 ശതമാനം അധിക ചുങ്കമാണ് അമേരിക്ക ചുമത്തിയിരിക്കുന്നത്.

യു.എസിൽ നിന്നുള്ള ഉൽപന്നങ്ങൾക്ക് നികുതി ചുമത്തുന്ന രാജ്യങ്ങൾക്ക് പകര ചുങ്കം എന്ന പേരിലാണ് ഈ തീരുവ ചുമത്തിയിരിക്കുന്നത്. ഇതുവഴി ഇപ്പോൾ തന്നെ പ്രതിസന്ധിയിൽ ആയിരിക്കുന്ന മത്സ്യബന്ധന- സംസ്‌കരണ മേഖല കൂടുതൽ പ്രതിസന്ധിയിലാകും. കടലാമ നിയന്ത്രണത്തിൻ്റെ പേരിൽ ഇന്ത്യയിൽ നിന്നുള്ള ചെമ്മീൻ കയറ്റുമതിക്ക് ഇപ്പോൾ തന്നെ യുഎസിൽ നിരോധനം നിലവിലുണ്ട്.

അക്വാകൾച്ചർ ചെമ്മീൻ മാത്രമാണ് അമേരിക്കയിലേ ക്ക് കയറ്റുമതി ചെയ്യുന്നത്. അടുത്ത വർഷം ജനുവരി മുതൽ നടപ്പാക്കുന്ന സസ്തനി നിരോധനത്തിനും പുറമെയാണ് പുതിയ നികുതി നിർദേശങ്ങൾ.

ഇനി മുതൽ അമേരിക്കയിലേക്ക് കയറ്റുമതി ചെയ്യുന്ന ചെമ്മീനിന് കിലോയ്ക്ക് എട്ടു ഡോളർ എന്നത് പതിനൊന്നും പന്ത്രണ്ടും ഡോളറായി മാറും. അമേരിക്കൻ ഉപഭോക്താവിനെ സംബന്ധിച്ച് ഇത് താങ്ങാവുന്നതല്ല. അവർ യു .എസ് കുറഞ്ഞ തീരുവ ചുമത്തിയ രാജ്യങ്ങളിൽ നിന്നും വരുന്ന വില കുറഞ്ഞ ചെമ്മീൻ വാങ്ങാൻ ഇടയുണ്ട്. ഇന്ത്യ അമേരിക്കയിൽ നിന്ന് ഇറക്കുമതി ചെയ്യുന്നത് സാമ്പത്തിക വർഷത്തിൽ 13 ലക്ഷം ഡോളറിൻ്റെ ഉൽപന്നങ്ങൾ മാത്രമാണ്. അതേ സമയം ഇന്ത്യയിൽ നിന്നുള്ള കയറ്റുമതി 310 കോടി ഡോളറിൻ്റേതാണ്. കേരളത്തിലെ 130 ഓളം കയറ്റുമതി സംസ്‌കരണശാലകളെയും അതിലെ പതിനായിരക്കണക്കായ തൊഴിലാളികളെയും യു.എസിന്റെ പകരച്ചുങ്കം നേരിട്ടു ബാധിക്കുമെന്ന് കേരള മത്സ്യത്തൊഴിലാളി ഐക്യവേദി (ടി.യു.സി.ഐ) സംസ്ഥാന പ്രസിഡന്റ് ചാൾസ് ജോർജ് സുപ്രഭാതത്തോട് പറഞ്ഞു.

കഴിഞ്ഞ വർഷം കേരളം കയറ്റുമതി ചെയ്തതിൽ 8,000 കോടി രൂപയ്ക്ക് മേലുള്ള ഉൽപ്പന്നങ്ങളും സമുദ്രോൽപന്നങ്ങളാണ്. കേരളത്തിന്റെ സമ്പദ്ഘടനയിൽ പ്രധാന പങ്കുവഹിക്കുന്ന ഒന്നാണ് സമുദ്ര മേഖല. 3,800 ട്രോൾ ബോട്ടുകളാണ് കയറ്റുമതി പ്രധാനമായ ചെമ്മീനുകൾ പിടിക്കുന്നത്. ലക്ഷക്കണക്കിന് പേരാണ് മത്സ്യബന്ധന സംസ്‌കരണ മേഖലകളിലായി പ്രവർത്തിക്കുന്നത്. ഇക്കാര്യത്തിൽ സംസ്ഥാന സർക്കാർ കേന്ദ്രസർക്കാരിൽ സമ്മർദം ചെലുത്തിയും കൂട്ടായ പ്രതിഷേധം നടത്തിയും ഇടപെടലുകൾ നടത്തിക്കണമെന്നാണ് മത്സ്യമേഖലയിൽ പ്രവർത്തിക്കുന്നവർ ആവശ്യപ്പെടുന്നത്.

US trade tariffs on imports A major setback for Keralas fishing sector