ന്യൂഡല്‍ഹി: വിവാദമായ വഖഫ് നിയമത്തെ ഭരണഘടനയ്ക്കും മതസ്വാതന്ത്ര്യത്തിനും നേരെയുള്ള ആക്രമണം എന്ന് വിശേഷിപ്പിച്ച് ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി. അഹമ്മദാബാദില്‍ നടന്ന അഖിലേന്ത്യാ കോണ്‍ഗ്രസ് കമ്മിറ്റി യോഗത്തില്‍ സംസാരിക്കുകയായിരുന്നു അദ്ദേഹം. ആര്‍.എസ്.എസും ബിജെപിയും ഭാവിയില്‍ രാജ്യത്തെ മതന്യൂനപക്ഷങ്ങളുടെ ഭൂമികള്‍ കൈവശപ്പെടുത്താനായി ശ്രമിക്കുമെന്ന് രാഹുല്‍ ഗാന്ധി ആശങ്കപ്പെട്ടു.

 

ജാതി സെന്‍സസ് നടത്തേണ്ടതിന്റെ ആവശ്യകത രാഹുല്‍ ഗാന്ധി ഊന്നിപ്പറഞ്ഞു. പ്രധാനമന്ത്രി നരേന്ദ്ര മോദി ഇതിനായി മുന്നോട്ടുവരാത്തത് വിമര്‍ശനത്തിന് വിധേയമാക്കി. പിന്നാക്ക വിഭാഗങ്ങള്‍ക്കുള്ള നീതി ഉറപ്പാക്കാന്‍ സര്‍ക്കാര്‍ നടപടി കൈക്കൊള്ളണമെന്നും അദ്ദേഹം ആവശ്യപ്പെട്ടു. തെലങ്കാന സര്‍ക്കാര്‍ 42% സംവരണം നടപ്പാക്കിയത് ഉദാഹരിച്ചുകൊണ്ട്, കോണ്‍ഗ്രസ് സര്‍ക്കാരുകള്‍ പിന്നാക്കവിഭാഗങ്ങള്‍ക്കായി മാതൃകാ നയങ്ങള്‍ രൂപവത്കരിച്ചിട്ടുണ്ടെന്ന് അദ്ദേഹം വ്യക്തമാക്കി. ജാതി സെന്‍സസ് നടത്തുന്നതില്‍ നിന്ന് കോണ്‍ഗ്രസ് പിന്നോട്ടില്ലെന്നും രാഹുല്‍ വ്യക്തമാക്കി.

 

ഭരണഘടനയെ ദുര്‍ബലപ്പെടുത്താനുള്ള എല്ലാ ശ്രമങ്ങളെയും കോണ്‍ഗ്രസ് എതിര്‍ക്കുമെന്ന് അദ്ദേഹം ഉറപ്പുനല്‍കി. 'എതിരാളികള്‍ക്ക് പണവും ശക്തിയും ഉണ്ടെങ്കിലും, സത്യത്തിന്റെയും ജനങ്ങളുടെ പിന്തുണയുടെയും ശക്തി കൊണ്ട് ഈ പ്രതിസന്ധികള്‍ മറികടക്കാം. രാജ്യത്തിനെതിരായ നീക്കങ്ങളെ ചെറുക്കാന്‍ കോണ്‍ഗ്രസിന് മാത്രമേ സാധിക്കൂവെന്നും,' രാഹുല്‍ ഗാന്ധി പറഞ്ഞു.