ശ്രീനഗർ: വിവാഹത്തിന്റെ സന്തോഷ മുഹൂർത്തത്തിൽ, ഒരുമിച്ചുള്ള ആദ്യ യാത്ര ആഘോഷിക്കാനെത്തിയ ഹിമാൻഷി നർവാളിന്റെ ജീവിതത്തിൽ ദുരന്തം കനത്ത നോവായി പതിച്ചു. ഇന്ത്യൻ നാവികസേനയിലെ ലെഫ്റ്റനന്റ് വിനയ് നർവാളിന്റെ ഭാര്യയായി വെറും നാലു ദിവസം ജീവിക്കാൻ കഴിഞ്ഞതിന്റെ അഭിമാനവും, ഭർത്താവിന്റെ വേർപാടിന്റെ വേദനയും ഒരുപോലെ ഉൾക്കൊണ്ടാണ് ഹിമാൻഷി മൃതദേഹത്തിന് മുന്നിൽ "ജയ് ഹിന്ദ്" എന്ന് വിളിച്ച് കണ്ണീരോടെ സല്യൂട്ട് നൽകിയത്.

ഏപ്രിൽ 16-നാണ് ഹരിയാനയിലെ കർണാലിൽ വിനയ് നർവാൾ ഹിമാൻഷിയെ വിവാഹം കഴിച്ചത്. മൂന്ന് ദിവസത്തിന് ശേഷം നടന്ന വിവാഹ സൽക്കാരത്തിന്റെ സന്തോഷം മങ്ങും മുമ്പേ, തിങ്കളാഴ്ച ദമ്പതികൾ മധുവിധുവിനായി കശ്മീരിലേക്ക് യാത്ര തിരിച്ചു. എന്നാൽ, ചൊവ്വാഴ്ച, പഹൽഗാമിന് സമീപമുള്ള 'മിനി സ്വിറ്റ്സർലൻഡ്' എന്നറിയപ്പെടുന്ന ബൈസരനിലെ പുൽമേട്ടിൽ, ഭേൽപുരി കഴിച്ച് കൊണ്ടിരിക്കുമ്പോൾ  ഭീകരവാദി വിനയിന്റെ തലയ്ക്ക് നേരെ വെടിയുതിർക്കുകയായിരുന്നു.

"ഞങ്ങൾ ഭേൽപുരി കഴിക്കുകയായിരുന്നു. പെട്ടെന്ന് ഒരാൾ വന്ന് എന്റെ ഭർത്താവിനെ വെടിവച്ചു. അവൻ മുസ് ലിം അല്ലെന്ന് പറഞ്ഞ ശേഷമാണ് വെടിവച്ചത്," ഹിമാൻഷി തേങ്ങലോടെ വീഡിയോയിൽ പറഞ്ഞു. ആ ക്രൂരമായ നിമിഷത്തിൽ, 26-കാരനായ വിനയ് ഹിമാൻഷിയുടെ കൺമുന്നിൽ മരണത്തിന് കീഴടങ്ങി.

നാല് ദിവസം മുമ്പാണ് ഇവർ വിവാഹിതരായത്. എല്ലാവരും ആഘോഷത്തിന്റെ നിറവിലായിരുന്നു," വിനയുടെ അയൽവാസിയായ നരേഷ് ബൻസാൽ വേദനയോടെ ഓർത്തു. രണ്ട് വർഷം മുമ്പ് നാവികസേനയിൽ ചേർന്ന വിനയ്, കൊച്ചിയിൽ ജോലി ചെയ്ത് വരികയായിരുന്നു. സമർപ്പണവും ആത്മാർത്ഥതയും കൊണ്ട് സഹപ്രവർത്തകർക്കിടയിൽ ബഹുമാനിക്കപ്പെട്ട ഉദ്യോഗസ്ഥനായിരുന്നുവെന്ന് പ്രതിരോധ ഉദ്യോഗസ്ഥർ സാക്ഷ്യപ്പെടുത്തി.

ബുധനാഴ്ച, വിനയിന്റെ മൃതദേഹം ഡൽഹിയിലെത്തിച്ചു. മ‍ൃതദേഹത്തിനരികിൽ, ഹൃദയം തകർന്ന് നിന്ന ഹിമാൻഷി കണ്ണീരോടെ പറഞ്ഞു: "അവന്റെ ആത്മാവിന് ശാന്തി ലഭിക്കട്ടെ. ഞങ്ങൾ എന്നും അവനെ അഭിമാനിക്കും." കുടുംബാംഗങ്ങളുടെ താങ്ങോടെ, അവർ ശവപ്പെട്ടിക്ക് മുന്നിൽ ആദരാഞ്ജലി അർപ്പിച്ചു. പിന്നീട്, കണ്ണുനീർ മറച്ച്, "ജയ് ഹിന്ദ്" എന്ന് ഉറക്കെ വിളിച്ച്, ഭർത്താവിന് അന്തിമോപചാരം നൽകി.

ഡൽഹി മുഖ്യമന്ത്രി രേഖ ഗുപ്ത, ഹിമാൻഷിയെ സന്ദർശിച്ച് അനുശോചനം അറിയിക്കുകയും വിനയിന്റെ മൃതദേഹത്തിന് ആദരാഞ്ജലി അർപ്പിക്കുകയും ചെയ്തു. നാടിന് വേണ്ടി ജീവൻ ബലിയർപ്പിച്ച വിനയ് നർവാളിന്റെ വിയോഗം, ഹിമാൻഷിയുടെ മനസ്സിൽ മാത്രമല്ല, കർണാലിലെ ഓരോ ഹൃദയത്തിലും തീരാത്ത മുറിവായി അവശേഷിക്കുകയാണ്.