കോഴിക്കോട് മെഡിക്കൽ കോളേജ് ആശുപത്രിയിലെ അത്യാഹിത വിഭാഗത്തിൽ രാത്രി 8 മണിയോടെ പരിഭ്രാന്തി ഉയർത്തിയ പുക നിയന്ത്രണ വിധേയം. 200-ലധികം രോഗികളെ സുരക്ഷിതമായി മെഡിക്കൽ കോളേജിന്റെ പ്രധാന കെട്ടിടത്തിലേക്കും ബീച്ച് ആശുപത്രി, മറ്റ് സ്വകാര്യ ആശുപത്രികളിലേക്കും സുരക്ഷിതമായി മാറ്റി. പുക ഉയർന്ന അത്യാഹിത വിഭാഗം ബ്ലോക്ക് പൂർണമായും ഒഴിപ്പിച്ചു. രോ​ഗികൾക്ക് ശ്വാസ തടസ്സം അനുഭവപ്പെട്ടിരുന്നു. കോഴിക്കോട് ജില്ല കലക്ടർ സ്നേഹിൽ കുമാർ ഐഎഎസ് ആശുപത്രിയിൽ എത്തി സ്ഥിതി​ഗതികൾ വിലയിരുത്തി. കെട്ടിടത്തിലെ വൈദ്യുതി പുനസ്ഥാപിക്കാൻ നിലവിൽ കഴിയാത്ത സാഹചര്യമാണ്. കെട്ടിടത്തിലെ നാലാം നിലയിലുള്ള ന്യൂറോ വിഭാ​ഗത്തിലേക്ക് പുക ഉയരാത്തതിനാൽ നാലാം നിലയിലുള്ള രോ​ഗികൾ സുരക്ഷിതരാണ്. 

ആരോഗ്യ മന്ത്രി വീണാ ജോർജ് സംഭവത്തിൽ അന്വേഷണത്തിന് ഉത്തരവിട്ടു. മെഡിക്കൽ വിദ്യാഭ്യാസ വകുപ്പ് ഡയറക്ടർക്ക് വിശദമായ അന്വേഷണത്തിന് നിർദേശം നൽകിയിട്ടുണ്ട്. പ്രാഥമിക നിഗമനം ഷോർട് സർക്യൂട്ട് ആണെങ്കിലും, പുകയുടെ ഉറവിടം സംബന്ധിച്ച് വ്യക്തതയില്ല. പുക വലിച്ചെടുക്കാനുള്ള നടപടികൾ തുടരുകയാണ്. അത്യാഹിത വിഭാഗത്തിലെ ഉപകരണങ്ങൾ പുറത്തേക്ക് മാറ്റി, ആവശ്യമായ എല്ലാ സൗകര്യങ്ങളും പ്രധാന കെട്ടിടത്തിൽ ഒരുക്കിയിട്ടുണ്ട്. 

നഗരത്തിലെ എല്ലാ ആംബുലൻസുകളും മെഡിക്കൽ കോളേജിലേക്ക് തിരിച്ചിട്ടുണ്ട്. ഫയർ ഫോഴ്സ് സംഘം സ്ഥലത്തെത്തി രക്ഷാപ്രവർത്തനങ്ങൾ ഏകോപിപ്പിക്കുന്നു. രോഗികൾക്ക് തുടർ ചികിത്സ ഉറപ്പാക്കിയിട്ടുണ്ടെന്നും ആശങ്കപ്പെടേണ്ട സാഹചര്യമില്ലെന്നും സൂപ്രണ്ട് വ്യക്തമാക്കി. പുതുതായി നിർമ്മിച്ച അത്യാഹിത വിഭാഗത്തിന്റെ കെട്ടിടത്തിൽ നിന്നാണ് പുക ഉയർന്നത്.

A smoke incident at Kozhikode Medical College's emergency ward on May 2, was brought under control with no casualties. Over 200 patients were safely shifted to other facilities, and an investigation is underway.