തിരുനാവായ: വിദ്യാർഥികളിലെ അമിതവണ്ണവും ആരോഗ്യപ്രശ്നങ്ങളും പരിഹരിക്കുന്നതിന് ആരോഗ്യപ്രദമായ ഭക്ഷണശീലങ്ങൾ വളർത്തുന്നതിൻ്റെ ഭാഗമായി സ്കൂൾ ഭക്ഷണത്തിൽ എണ്ണയുടെ അളവ് കുറയ്ക്കാൻ വിദ്യാഭ്യാസ വകുപ്പ്. വിഷയത്തിൽ കേന്ദ്രവിദ്യാഭ്യാസ,സാക്ഷരതാ സെക്രട്ടറി കഴിഞ്ഞ മാസം 15ന് സംസ്ഥാന പൊതുവിദ്യാഭ്യാസ ഡയരക്ടർക്ക് സർക്കുലർ അയച്ചിരുന്നു. തുടർന്ന് വിദ്യാഭ്യാസ ഡയരക്ടർ, ജില്ലാ വിദ്യാഭ്യാസ ഉപഡയരക്ടർമാർക്ക് സർക്കുലർ അയച്ചിരിക്കുകയാണ്.

അമിതവണ്ണത്തിൽ ആശങ്ക പ്രകടിപ്പിക്കുന്ന സർക്കുലറിൽ പോഷക സന്തുലിതമായ ഭക്ഷണത്തിൻ്റെ ആവശ്യകത ഊന്നിപ്പറയുന്നുണ്ട്. എല്ലാ വിദ്യാർഥികളും എണ്ണ ഉപഭോഗത്തെക്കുറിച്ച് ശ്രദ്ധയുള്ളവരാകാനാണ് ഈ പദ്ധതി.  ഡീപ്പ്-ഫ്രൈയിംഗിന് പകരം ഗ്രിൽ ചെയ്യൽ, ആവിയിൽ വേവിക്കൽ തുടങ്ങിയ ആരോഗ്യകരമായ പാചകരീതികൾ കുട്ടികളിൽ ശീലമാക്കണം. അധിക കലോറി എരിച്ചുകളയുന്നതിനായി വ്യായാമം, യോഗ മുതലായവയുടെ പ്രാധാന്യത്തെക്കുറിച്ചും കുട്ടികളിൽ അവബോധം സൃഷ്ടിക്കണം. കൂടാതെ സ്കൂൾ ന്യൂട്രീഷൻ ഗാർഡൻ പരിപാലനത്തിൽ വിദ്യാർഥികളെ ഉൾപ്പെടുത്തണം.

പോഷക സന്തുലിതമായ ഭക്ഷണം ശ്രദ്ധാപൂർവം തയാറാക്കുന്നതിനും പാചക എണ്ണയുടെ ഉപയോഗം പത്ത് ശതമാനം കുറയ്ക്കുന്നതിനും സ്കൂൾ അധികൃതർ നടപടി സ്വീകരിക്കണം. പാചകത്തിന് ഫോർട്ടിഫൈഡ് അരി, ധാന്യങ്ങൾ, പയർവർഗങ്ങൾ, പച്ചക്കറികൾ, ഇലക്കറികൾ, ഫോർട്ടിഫൈഡ് ഭക്ഷ്യ എണ്ണ, ഡബിൾ ഫോർട്ടിഫൈഡ് ഉപ്പ്  എന്നിവ ഉൾക്കൊള്ളിക്കണം. ഇവയുടെ പ്രാധാന്യം സംബന്ധിച്ച മോഡ്യൂളുകൾ പാചകത്തൊഴിലാളികൾക്കുള്ള 2025-26 അധ്യയനവർഷത്തെ ട്രെയിനിങ്ങിൽ ഉൾക്കൊള്ളിച്ചിട്ടുണ്ട്.

ആരോഗ്യകരമായ ഭക്ഷണശീലങ്ങൾ വളർത്തിയെടുക്കുന്നതിനും കുറഞ്ഞ എണ്ണ ഉപയോഗിച്ച് പോഷക സമൃദ്ധമായ ഭക്ഷണം തയാറാക്കുന്നതിനുമുള്ള കർശന മാർഗനിർദേശം ഉപജില്ലാതലത്തിൽ നിന്ന് സ്കൂൾ അധികൃതർക്ക് നൽകാനാണ് വിദ്യാഭ്യാസ വകുപ്പ് നിർദേശിച്ചത്. നൂൺ ഫീഡിംഗ് സൂപ്പർവൈസർമാർ, നൂൺമീൽ ഓഫിസർമാർ എന്നിവർ സ്കൂൾ സന്ദർശനവേളകളിൽ ഇവ പാലിക്കപ്പെടുന്നുണ്ടോ എന്ന്  പരിശോധിക്കുകയും ചെയ്യും.

Obesity among students reduction in oil content in school meals Education Department launches new plan