കോഴിക്കോട്: തെരുവുനായ്ക്കളുടെ കടിയേറ്റുള്ള മരണം കേരളത്തിൽ കൂടുന്നു. തെരുവുനായ്ക്കൾ പെരുകുന്നത് തടയാനുള്ള നടപടികളോ അവതാളത്തിലും. 2016ൽ രണ്ടുപേർ മാത്രമാണ് പേ വിഷബാധയേറ്റ് മരിച്ചതെങ്കിൽ 2021ൽ 11ആയും 2024ൽ 26 ആയും വർധിച്ചു. 2025ൽ ഇതുവരെ 12 പേർ മരിച്ചു. കഴിഞ്ഞ ദിവസമാണ് കുത്തിവയ്പ്പ് എടുത്ത ശേഷവും ബാലിക മരിച്ചത്. 
2017ൽ 1.36 ലക്ഷം പേർക്ക് തെരുവുനായ്ക്കളുടെ കടിയേറ്റപ്പോൾ 2021ൽ 2.21 ലക്ഷമായും 2024ൽ 3.17 ലക്ഷമായും വർധിച്ചു. 2024ൽ കൂടുതൽ പേർക്ക് പട്ടിയുടെ കടിയേറ്റത് തിരുവനന്തപുരം ജില്ലയിലാണ്.  50780 പേർക്ക് കടിയേറ്റു. കൊല്ലത്ത് 37618, എറണാകുളം 32086, പാലക്കാട് 31303, തൃശൂർ 29363 എന്നിങ്ങനെയാണ് കടിയേറ്റു ചികിത്സ തേടിയത്. 

തെരുവുനായ്ക്കളെ നിയന്ത്രിക്കാൻ 15 ജനനനിയന്ത്രണ കേന്ദ്രങ്ങളുണ്ടെങ്കിലും ഫലവത്താവുന്നില്ല. 2019ൽ കേരളത്തിൽ 2.89 ലക്ഷം തെരുവുനായ്ക്കളുണ്ട്. തിരുവനന്തപുരം നഗരത്തിൽ മാത്രം 6000 മുതൽ 10000 വരെയുണ്ടായിരുന്നു. ഇവിടെ പ്രവർത്തിക്കുന്ന ഏക അനിമൽ ബെർത്ത് കൺട്രോൾ കേന്ദ്രത്തിൽ വർഷം 1200 നായ്ക്കളെ ശസ്ത്രക്രിയക്ക് വിധേയമാക്കുന്നുണ്ടെന്ന് അവകാശപ്പെടുന്നു. 

ശസ്ത്രക്രിയ ചെയ്യുന്ന നായ്ക്കൾക്ക് പേ വിഷത്തിനെതിരായ കുത്തിവയ്പ് നടത്തുന്നുണ്ടെങ്കിലും കാലാവധി ഒരു വർഷം മാത്രമാണ്. കുത്തിവയ്പ് നടത്തിയ ശേഷം പിടിച്ച അതേ സ്ഥലത്ത് വിടുകയാണ് രീതി. 
തെരുവുനായ്ക്കളുടെ കടിയേറ്റ് നഷ്ടപരിഹാരത്തിന് നിരവധി അപേക്ഷകർ കേരളത്തിൽ നിന്നുണ്ടാവുന്നു. സുപ്രിംകോടതി ഇതിനായി സിരിജഗൻ കമ്മിറ്റിയെ നിയോഗിച്ചിരുന്നു. 30000 മുതൽ 17 ലക്ഷം രൂപ വരെ നഷ്ടപരിഹാരം വിധിക്കുകയും ചെയ്തു. വൈകിക്കുന്ന ഓരോ വർഷവും ഒൻപത് ശതമാനം പലിശയോടെ നഷ്ടപരിഹാരം നൽകണമെന്നാണ് സിരിജഗൻ റിപ്പോർട്ട്. 2024ൽ 32 പഞ്ചായത്തുകളോട് 39 ലക്ഷം നൽകാൻ പഞ്ചായത്ത് വകുപ്പ് നിർദേശിച്ചിരുന്നു.

ഈ സാഹചര്യത്തിൽ പ്രതിരോധ കുത്തിവയ്പ്പ് എടുക്കുന്നതിന് നിർദേശം ഉയർന്നിട്ടുണ്ട്. ഇപ്പോൾ ആരോഗ്യപ്രവർത്തകർക്കും മൃഗങ്ങളുമായി ഇടപഴകുന്നവർക്കും മാത്രമാണ് ഈ കുത്തിവയ്പ് എടുക്കുന്നത്. പ്രതിരോധകുത്തിവയ്പ്പ് എടുത്തവർക്ക് കടിയോ മാന്തലോ ഏറ്റാൽ രണ്ടുഡോസ് കുത്തിവയ്പ്പ് എടുത്താൽ മതിയാവും. അല്ലെങ്കിൽ നാലോ അഞ്ചോ കുത്തിവയ്പുകൾ വേണം. 
വളർത്തുമൃഗങ്ങളുടേതടക്കം കടിയോ മാന്തലോ ഏറ്റ് രക്തം പൊടിയുന്നതിനെ മൂന്നാം ഗ്രേഡ് മുറിവായാണ് കണക്കാക്കുന്നത്. അങ്ങനെയുണ്ടായാൽ മുറിവിന് ചുറ്റുമാണ് കുത്തിവയ്പ് എടുക്കുന്നത്. ഇതിനുള്ള സിറം പ്രധാനമായി രണ്ടു തരത്തിലുണ്ട്. താരതമ്യേന വിലക്കുറവുള്ള കുതിരയിൽ നിന്നെടുക്കുന്ന ഇനമാണ് സർക്കാർ ആശുപത്രികളിൽ ലഭ്യമാക്കുന്നത്. മനുഷ്യരിൽ നിന്ന് എടുത്ത മരുന്നിന് വിലകൂടുതലാണ്. പണം മുടക്കാൻ തയാറുള്ളവർക്ക് മനുഷ്യനിൽ നിന്നുള്ള സിറം തന്നെ കുത്തിവയ്ക്കുന്നതിന് അധികൃതർ തയാറാവുന്നു. 

വളർത്തുമൃഗങ്ങളിൽ നിന്ന് കടിയോ മാന്തലോ ഏറ്റ നിലയിൽ നിരവധി പേരാണ് ദിവസവും ആശുപത്രികളെ സമീപിക്കുന്നത്. വളർത്തുന്ന നായ്ക്കൾക്ക് പ്രതിരോധ കുത്തിവയ്പ് എടുക്കുന്നത്രയും പൂച്ചകൾക്ക് എടുക്കുന്നില്ല. മനുഷ്യരിൽ പ്രതിരോധ കുത്തിവയ്പ് എടുക്കുന്നത് വ്യാപകമായാൽ മരണം കുറയ്ക്കാമെന്ന് ചൂണ്ടിക്കാണിക്കുന്നുണ്ട്.

Stray dog attacks Death toll rises in Kerala