റിയാദ്: അതിവേഗ യാത്രയുടെയും ഡിജിറ്റൽ വിസകളുടെയും കാലഘട്ടത്തിൽ, നാല് തീർത്ഥാടകർ അസാധാരണമായ ഒരു യാത്രാ മാർഗ്ഗം സ്വീകരിച്ചു മക്കയിലെത്തി. യൂറോപ്പിൽ നിന്ന് സഊദി അറേബ്യയിലേക്ക് കുതിരപ്പുറത്ത് കയറി ഹജ്ജ് തീർത്ഥാടനം നടത്തിയാണ് നാലംഗ സംഘം വ്യത്യസ്തരാകുന്നത്. മൂന്ന് സ്പാനിഷ് പൗരന്മാരും ഒരു മൊറോക്കൻ പൗരനും അടങ്ങുന്ന സംഘമാണ് വേറിട്ട യാത്രയോടെ ഈ വർഷം ഹജ്ജിനെത്തുന്നത്.

ആഴ്ചകൾ നീണ്ട യാത്രക്കൊടുവിൽ സംഘം വടക്കൻ സഊദിയിലെ അൽ ഖുറയ്യത്ത് മേഖലയിലെ അൽ ഹദീത അതിർത്തി ക്രോസിംഗിൽ എത്തി. റൈഡർമാരുടെ ഭക്തിയും ദൃഢനിശ്ചയവും കണ്ട് പ്രാദേശിക ഉദ്യോഗസ്ഥരും സന്നദ്ധപ്രവർത്തകരും ഊഷ്മളമായി സ്വീകരിച്ചു. പുണ്യസ്ഥലങ്ങളിലേക്കുള്ള യാത്രയിൽ ആഴ്ചകളോളം കുതിരപ്പുറത്ത് സഞ്ചരിച്ചതിന് ശേഷം പൊടിപടലങ്ങൾ നിറഞ്ഞ, ക്ഷീണിതരായ, എന്നാൽ ദൃഢനിശ്ചയമുള്ള അവരുടെ വരവിന്റെ വീഡിയോ സോഷ്യൽ മീഡിയകളിൽ വൈറലായി.

അൽ ഹദീത സെന്റർ തലവനായ മംദൂഹ് അൽ മുതൈരി തീർഥാടകരെ നേരിട്ട് സ്വാഗതം ചെയ്തു. സുരക്ഷിതവും സ്വീകാര്യവുമായ ഹജ്ജിനായി ഹൃദയംഗമമായ ആശംസകൾ നേർന്ന അദ്ദേഹം വിശ്വാസത്തിന്റെയും സഹിഷ്ണുതയുടെയും ശക്തമായ പ്രതീകമായി യാത്രയെ പ്രശംസിച്ചു. എല്ലാ തീർഥാടകർക്കും മാന്യവും കാര്യക്ഷമവുമായ സേവനം നൽകുന്നതിനുള്ള വിശാലമായ സർക്കാർ ശ്രമങ്ങളുടെ ഭാഗമായി അതിർത്തി ഉദ്യോഗസ്ഥരും സപ്പോർട്ട് സ്റ്റാഫും മെഡിക്കൽ പരിശോധനകളും ലഘുഭക്ഷണങ്ങളും മാർഗ്ഗനിർദ്ദേശങ്ങളും നൽകിയാണ് ഇവരെ സ്വീകരിച്ചത്. 

ഔദ്യോഗിക സ്വീകരണത്തിന് പുറമേ, അൽ ഹദീതയിലെ പ്രാദേശിക വികസന അസോസിയേഷനും റൈഡർമാർക്കായി ചെറിയ ആഘോഷവും സംഘടിപ്പിച്ചിരുന്നു. സന്നദ്ധപ്രവർത്തകർ പൂക്കൾ, ഹോസ്പിറ്റാലിറ്റി കിറ്റുകൾ എന്നിവ കൈമാറി ഊഷ്മളമായ സ്വീകരണം നൽകി.