ഷാര്‍ജ: സര്‍ക്കാര്‍ ജീവനക്കാരായ വനിതകള്‍ക്ക് 'കെയര്‍ ലീവ്' എന്ന പുതിയ തരം അവധി അനുവദിച്ചു. തുടര്‍ച്ചയായ പരിചരണം ആവശ്യമുള്ള രോഗിയായ അല്ലെങ്കില്‍ ഭിന്നശേഷിക്കാരായ കുഞ്ഞുങ്ങള്‍ക്ക് ജന്മം നല്‍കുന്ന അമ്മമാര്‍ക്കാണ് ഈ അവധി അനുവദിച്ചിരിക്കുന്നതെന്ന് ഷാര്‍ജ മാനവ വിഭവശേഷി വകുപ്പ് ചെയര്‍മാന്‍ അബ്ദുല്ല ഇബ്രാഹിം അല്‍ സാബി ഡയറക്ട് ലൈന്‍ റേഡിയോ പരിപാടിയില്‍ വ്യക്തമാക്കി. 

പ്രസവാവധി പൂര്‍ത്തിയാക്കിയതിന് ശേഷം ആരംഭിക്കുന്ന ഈ അവധി, വാര്‍ഷികാടിസ്ഥാനത്തില്‍ മൂന്ന് വര്‍ഷം വരെ നീട്ടാന്‍ സാധിക്കും. പുതിയ നിയന്ത്രണ പ്രകാരം, യോഗ്യതയുള്ള ഒരു മെഡിക്കല്‍ അതോറിറ്റി അംഗീകരിച്ച മെഡിക്കല്‍ റിപ്പോര്‍ട്ട് സമര്‍പ്പിച്ചാലാണ് അവധി അനുവദിക്കുക. ആദ്യം ഇത് ഒരു വര്‍ഷത്തെ ശമ്പളത്തോടുകൂടിയ പ്രസവാവധിയോടൊപ്പം പ്രവര്‍ത്തിക്കും പിന്നീട്, ഔദ്യോഗിക അംഗീകാരത്തോടും ആവശ്യമായ മെഡിക്കല്‍ രേഖകളോടും കൂടി മൂന്ന് വര്‍ഷം വരെ വര്‍ഷം തോറും നീട്ടാവുന്നതാണ്.

2025 മെയ് 5 മുതലാണ് കെയര്‍ ലീവ് പ്രാബല്യത്തില്‍ വരുന്നത്. മെഡിക്കല്‍ വെല്ലുവിളികള്‍ നേരിടുന്ന നവജാതശിശുക്കളുള്ള ജോലി ചെയ്യുന്ന അമ്മമാരെ പിന്തുണയ്ക്കുകയെന്ന ലക്ഷ്യത്തോടെയാണിത്. കുഞ്ഞിന്റെ ആരോഗ്യം മെച്ചപ്പെട്ടാല്‍, ഈ അവധി നിര്‍ത്തിവെക്കുകയും മെഡിക്കല്‍ റിപ്പോര്‍ട്ടിന് അനുസൃതമായി ജോലിയില്‍ തിരിച്ചെത്താന്‍ ആവശ്യപ്പെടുകയും ചെയ്യും. ഷെയ്ഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമിയുടെ നിര്‍ദ്ദേശപ്രകാരമാണ് ഈ പുതിയ നയം രൂപീകരിച്ചിരിക്കുന്നത്. 

അതേസമയം, അവധി മൂന്ന് വര്‍ഷത്തില്‍ കൂടുതല്‍ നീട്ടേണ്ട സാഹചര്യങ്ങളില്‍, കൂടുതല്‍ അവലോകനത്തിനും തീരുമാനത്തിനുമായി വിഷയം ഹയര്‍ കമ്മിറ്റി ഫോര്‍ ഹ്യൂമന്‍ റിസോഴ്‌സസിന് റഫര്‍ ചെയ്യണം.

Sharjah has approved a groundbreaking 'Care Leave' policy for female government employees with newborns requiring ongoing medical care. Announced by the Sharjah Human Resources Department, this leave extends beyond standard maternity leave for up to 3 years, contingent on medical reports.