തിരുവനന്തപുരം: നന്തന്‍കോട് മാതാപിതാക്കളെ ഉള്‍പ്പെടെ നാലുപേരെ കൊന്ന കേസില്‍ ഇന്ന് കോടതി വിധിപറയും. തിരുവനന്തപുരം ആറാം അഡീഷണല്‍ സെഷന്‍സ് കോടതിയാണ് വിധി പറയുക. കേഡല്‍ ജെന്‍സന്‍ രാജയാണ് കേസിലുള്ള ഏക പ്രതി. 2017 ഏപ്രില്‍ മാസത്തിലാണ് നന്തന്‍കോട് ബെയ്‌ലിസ് കോംപൗണ്ട് 117ല്‍ താമസിച്ചിരുന്ന റിട്ടയേര്‍ഡ് പ്രഫസര്‍ രാജ തങ്കവും ഭാര്യ ജീന്‍ പദ്മയും മകള്‍ കരോലിനും ബന്ധുവായ ലളിത ജയിനും കൊല്ലപ്പെടുന്നത്.

രാജയുടെ മകനായ കേഡല്‍ തന്നെയാണ് കൊലപാതകങ്ങള്‍ നടത്തിയതെന്നാണ് കേസ്. ആദ്യം ദുര്‍മന്ത്രവാദമാണ് എന്നാണ് പ്രതി പൊലിസിനോട് പറഞ്ഞതെങ്കിലും പിന്നീടുള്ള ചോദ്യം ചെയ്യലില്‍ ബാല്യകാലത്ത് രക്ഷിതാക്കളില്‍ നിന്നുണ്ടായ അവഗണനയാണ് കൊലപാതകത്തിലേക്ക് എത്തിച്ചതെന്നായിരുന്നു.

 വിചാരണയില്‍ കുറ്റമൊന്നും ചെയ്തിട്ടില്ലെന്നാണ് കേഡല്‍ കോടതിയോട് പറഞ്ഞത്. പൊലിസ് ശേഖരിച്ച ശാസ്ത്രീയ തെളിവുകള്‍ പ്രോസിക്യൂഷന്‍ കോടതിയിലും നിരത്തി. 41 സാക്ഷികളെ വിസ്തരിച്ചു. 104 രേഖകളും 57 വസ്തുക്കളും കോടതിയില്‍ ഹാജരാക്കിയിട്ടുണ്ട്.