ദുബൈ/മസ്‌കത്ത്: യുഎഇ-ഒമാന്‍ റെയില്‍ നെറ്റ്‌വര്‍ക്ക് പദ്ധതിയുടെ പ്രവര്‍ത്തനങ്ങള്‍ അതിവേഗത്തില്‍ പുരോഗമിക്കുന്നു. റെയില്‍വേ ട്രാക്കുകള്‍ സ്ഥാപിക്കുന്നതിനായി ഭാരമേറിയ മണ്ണുമാന്തി യന്ത്രങ്ങളും മറ്റ് ഉപകരണങ്ങളും നിയുക്ത പ്രദേശത്ത് ഇതിനകം വിന്യസിച്ചുകഴിഞ്ഞു.

'ആത്മവിശ്വാസത്തോടെയുള്ള ചുവടുവയ്പ്പുകളിലൂടെ, ഞങ്ങള്‍ വിടവ് നികത്തുകയും നമ്മെ ഒരുമിച്ച് കൊണ്ടുവരുന്ന ഒരു ഭാവി കെട്ടിപ്പടുക്കുകയും ചെയ്യുന്നു. ഹഫീത് റെയില്‍വേ ശൃംഖല വഴി യുഎഇയെയും ഒമാനെയും ബന്ധിപ്പിക്കുന്നതിനുള്ള പാതയില്‍ ഓരോ ദിവസവും പുരോഗതി കൈവരിക്കുന്നു' എന്ന് ഹഫീത് റെയില്‍ എക്‌സില്‍ കുറിച്ചു.

ഒമാന്‍ യുഎഇ റെയില്‍ ലിങ്ക് പദ്ധതിയുടെ ചുമതല ഹഫീത് റെയില്‍ കമ്പനിക്കാണ്.

പദ്ധതിക്ക് ഏകദേശം 2.5 ബില്യണ്‍ ഡോളര്‍ (ഏകദേശം 960 ദശലക്ഷം ഒമാനി റിയാല്‍) ചിലവു വരുമെന്നാണ് കണക്കുകൂട്ടുന്നത്. ഇരു രാജ്യങ്ങള്‍ക്കും സാമ്പത്തികവും സാമൂഹികവുമായ നേട്ടങ്ങള്‍ ഉണ്ടാക്കുന്ന ഈ ഏകീകൃത ഗതാഗത, ലോജിസ്റ്റിക് ശൃംഖല സ്ഥാപിക്കുക വഴി ഗള്‍ഫ് മേഖലയിലെ തന്നെ ഏറ്റവും ശക്തമായ സാമ്പത്തിക ഇടനാഴിയാക്കി റെയില്‍വേയെ മാറ്റാനാണ് ശ്രമിക്കുന്നത്.

ഒമാനിലെയും യുഎഇയിലെയും അഞ്ച് തുറമുഖങ്ങളെയും വ്യാവസായിക മേഖലകളെയും ഈ റെയില്‍വേ ബന്ധിപ്പിക്കും. ഓരോ ചരക്ക് ട്രെയിനിലും 15,000 ടണ്ണിലധികം സാധനങ്ങള്‍ വഹിക്കുമെന്നാണ് പ്രതീക്ഷിക്കുന്നത്. ഏകദേശം 270 സ്റ്റാന്‍ഡേര്‍ഡ് കണ്ടെയ്‌നറുകള്‍ക്ക് തുല്യമാണിത്.

അബൂദബിക്കും സൊഹാറിനും ഇടയിലുള്ള യാത്രാ സമയം 100 മിനിറ്റായി കുറയ്ക്കും. ചരക്ക് ട്രെയിനുകളുടെ വേഗത മണിക്കൂറില്‍ 120 കിലോമീറ്റര്‍ വരെയാകും.

പാസഞ്ചര്‍ ട്രെയിനുകള്‍ മണിക്കൂറില്‍ 200 കിലോമീറ്റര്‍ വരെ വേഗതയില്‍ സര്‍വീസ് നടത്തും. ഒരു യാത്രയില്‍ 400 യാത്രക്കാരെ വരെ ഉള്‍ക്കൊള്ളാന്‍ കഴിയും. 238 കിലോമീറ്റര്‍ ദൈര്‍ഘ്യമുള്ള ഈ റെയില്‍വേയില്‍ 60 പാലങ്ങളും 2.5 കിലോമീറ്ററില്‍ കൂടുതല്‍ നീളമുള്ള തുരങ്കങ്ങളും ഉള്‍പ്പെടും.

ഒമാന്‍ വിഷന്‍ 2040, യുഎഇ സെന്റിനിയല്‍ 2071 എന്നീ മിഷനുകള്‍ക്ക് അനുസൃതമായാണ് പദ്ധതി നടപ്പാക്കുന്നത്. സൊഹാര്‍ തുറമുഖത്തെ യുഎഇ റെയില്‍ ശൃംഖലയുമായി ബന്ധിപ്പിക്കുന്നതിലൂടെ, ഗതാഗത, ലോജിസ്റ്റിക് സേവനങ്ങള്‍ക്കുള്ള തന്ത്രപരമായ കേന്ദ്രമെന്ന നിലയില്‍ മേഖലയുടെ പങ്ക് വര്‍ധിപ്പിക്കുന്നതിലൂടെ, ഒരു സുപ്രധാന വ്യാപാര ഇടനാഴി സൃഷ്ടിക്കപ്പെടുമെന്ന് ഇരു രാജ്യങ്ങളും പ്രതീക്ഷിക്കുന്നു.

The Oman-UAE railway project is moving forward with an estimated cost of $2.5 billion, aiming to enhance regional connectivity and boost economic growth between the two nations.