തിരുവനന്തപുരം: ഈ വർഷത്തെ തെക്കുപടിഞ്ഞാറൻ മൺസൂൺ മെയ് 13ഓടെ എത്തിച്ചേരാനാണ് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. തെക്കൻ ആൻഡമാൻ കടൽ, തെക്കുകിഴക്കൻ ബംഗാൾ ഉൾക്കടൽ, നിക്കോബാർ ദ്വീപ് മേഖലയിലേക്കാണ് കാലവർഷം കടന്നുവരുന്നതെന്ന് ഔദ്യോഗിക പ്രവചനത്തിലാണ് പറയുന്നത്. രാജ്യത്താകമാനമായി ഇത്തവണ സാധാരണയെക്കാൾ 105% വരെ കൂടുതൽ മഴ ലഭിക്കാമെന്നു മുമ്പ് തന്നെ കാലാവസ്ഥാ വകുപ്പ് മുന്നറിയിച്ചിരുന്നു.

 ഇന്ന് മുതൽ മഴയും കാറ്റും

സംസ്ഥാനത്ത് ഇന്നും അടുത്ത ദിവസങ്ങളിലും ചില ഇടങ്ങളിൽ ഇടിമിന്നലോടുകൂടിയ മഴക്കും മണിക്കൂറിൽ 40 മുതൽ 50 കിലോമീറ്റർ വരെ വേഗതയുള്ള കാറ്റിനും സാധ്യതയുണ്ടെന്ന് കാലാവസ്ഥാ വകുപ്പ് വ്യക്തമാക്കി. മേയ് 7 മുതൽ 10 വരെയുള്ള ദിവസങ്ങളിൽ മണിക്കൂറിൽ 30 മുതൽ 40 കിലോമീറ്റർ വേഗതയിൽ കാറ്റിനൊപ്പം ഇടിമിന്നലോട് കൂടിയ മഴയ്ക്കും സാധ്യതയുണ്ടെന്നാണ് മുന്നറിയിപ്പ്.

 യെല്ലോ അലർട്ട് പ്രഖ്യാപിച്ച ജില്ലകൾ:
09/05/2025: ഇടുക്കി, പാലക്കാട്

10/05/2025: പത്തനംതിട്ട, ഇടുക്കി, മലപ്പുറം

 താപനില ഉയരുന്നു

തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ, കാസർകോട്, കൊല്ലം ജില്ലകളിൽ താപനില ഉയരാൻ സാധ്യതയുള്ളതിനാൽ യെല്ലോ അലർട്ട് പ്രഖ്യാപിച്ചിരിക്കുകയാണ്.

കോഴിക്കോട്: 38 ഡിഗ്രി സെൽഷ്യസ്

പാലക്കാട്: 37 ഡിഗ്രി സെൽഷ്യസ്

മറ്റു ജില്ലകൾ: 36 ഡിഗ്രി സെൽഷ്യസ് വരെ ഉയരാൻ സാധ്യത

മലയോര മേഖലയൊഴികെ, ഈ ജില്ലകളിൽ ചൂടും അതിനോട് അനുബന്ധിച്ച അസ്വസ്ഥതയും ഇന്ന് നാളെയും അനുഭവപ്പെടാം.

 മത്സ്യത്തൊഴിലാളികൾക്ക് മുന്നറിയിപ്പുകൾ

കേരള, കർണാടക, ലക്ഷദ്വീപ് തീരങ്ങൾ: ഇന്ന് മത്സ്യബന്ധനത്തിന് തടസ്സമില്ല.

06 & 07 മേയ്: ഒമാൻ തീരം, വടക്കുപടിഞ്ഞാറൻ അറബിക്കടൽ, ഗുജറാത്ത് തീരം, വടക്കൻ കൊങ്കൺ തീരങ്ങൾ — ഈ മേഖലയിലെ കടലിൽ മണിക്കൂറിൽ 55 കിലോമീറ്റർ വരെ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാൽ മത്സ്യബന്ധനം പാടില്ല.

 കള്ളക്കടൽ: കടലാക്രമണത്തിന് സാധ്യത

ഇന്ന് രാത്രി 11:30 വരെ കേരള തീരത്ത് 0.3 – 0.9 മീറ്ററും കന്യാകുമാരി തീരത്ത് 0.7 – 1.1 മീറ്ററും ഉയരത്തിൽ തിരമാലകൾ ഉണ്ടാകുമെന്നു ദേശീയ സമുദ്രസ്ഥിതിപഠന ഗവേഷണ കേന്ദ്രം മുന്നറിയിപ്പ് നൽകി. ഈ കള്ളക്കടൽ പ്രതിഭാസം കടലാക്രമണത്തിന് വഴിയൊരുക്കിയേക്കും, അതിനാൽ തീരദേശവാസികളും മത്സ്യത്തൊഴിലാളികളും അധിക ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റി നിർദേശിച്ചു.