ലണ്ടൻ: ഇസ്‌റാഈൽ ഗസ്സയിൽ നടത്തുന്ന വംശഹത്യയിൽ പ്രതിഷേധിച്ച് 800-ലധികം അഭിഭാഷകരും അക്കാദമിക് വിദഗ്ധരും വിരമിച്ച മുതിർന്ന ജഡ്ജിമാരും ഇസ്‌റാഈലിന് മേൽ ഉപരോധം ഏർപ്പെടുത്തണമെന്ന് യുകെ സർക്കാരിനോട് അഭ്യർഥിച്ചു. അടിസ്ഥാനപരമായ അന്താരാഷ്ട്ര ബാധ്യതകൾക്കനുസൃതമായി പ്രവർത്തിക്കാനും ഇസ്രായേൽ സർക്കാരിനും മന്ത്രിമാർക്കും മേൽ ഉപരോധങ്ങൾ ഏർപ്പെടുത്താനും മറ്റ് നടപടികൾ സ്വീകരിക്കാനും ഇവർ ആവശ്യപ്പെട്ടു.

യുകെ ഉൾപ്പെടെയുള്ള എല്ലാ രാജ്യങ്ങളും, വംശഹത്യ തടയുന്നതിനും ഇസ്രായേലിന് ആവശ്യമായ ശിക്ഷ ഉറപ്പാക്കുന്നതിനും വേണ്ടി പ്രവർത്തിക്കാൻ ബാധ്യസ്ഥരാണ്. അന്താരാഷ്ട്ര മാനുഷിക നിയമങ്ങളോടുള്ള ബഹുമാനം ഉറപ്പാക്കുന്നതിനും അന്താരാഷ്ട്ര നിയമ ലംഘനങ്ങൾ അവസാനിപ്പിക്കുന്നതിനും നിയമപരമായി തങ്ങളുടെ അധികാര പരിധിയിലുള്ള എല്ലാ ന്യായമായ നടപടികളും സ്വീകരിക്കാൻ രാജ്യങ്ങൾ തയ്യാറാകണം. യുകെയുടെ ഇതുവരെയുള്ള നടപടികൾ ഈ മാനദണ്ഡങ്ങൾ പാലിക്കുന്നതിൽ പരാജയപ്പെട്ടു എന്നും ബ്രിട്ടീഷ് പ്രധാനമന്ത്രി കെയർ സ്റ്റാർമറിനെ അഭിസംബോധന ചെയ്ത കത്തിൽ ഒപ്പിട്ടവർ പറഞ്ഞു.

"ഗസ്സയിൽ വംശഹത്യ നടക്കുന്നുണ്ട്, അല്ലെങ്കിൽ കുറഞ്ഞത് വംശഹത്യ നടക്കാനുള്ള ഗുരുതരമായ അപകടസാധ്യതയുണ്ട്" എന്ന് അവർ പ്രസ്താവനയിൽ പറഞ്ഞു.

അന്താരാഷ്ട്ര സമ്മർദ്ദങ്ങൾക്ക് വഴങ്ങി ഇസ്‌റാഈൽ ഇപ്പോൾ ഗസ്സയിൽ അനുവദിച്ചിരിക്കുന്ന പരിമിതമായ സഹായം, ഭക്ഷണം, മെഡിക്കൽ സാധനങ്ങൾ, മനുഷ്യജീവിതത്തിന് അത്യാവശ്യമായ വസ്തുക്കൾ എന്നിവ 11 ആഴ്ചത്തെ ഉപരോധം ഉണ്ടാക്കിയ മാനുഷിക ദുരന്തത്തെ ഇല്ലാതാക്കാൻ ഒട്ടും പര്യാപ്തമല്ല എന്നും 800-ലധികം അഭിഭാഷകർ ഉൾപ്പെടെ ഒപ്പിട്ടവർ അഭിപ്രായപ്പെട്ടു.

ഗസ്സയിൽ ഇസ്‌റാഈൽ ഒരേ സമയം സൈനിക പ്രവർത്തനങ്ങൾ വർധിപ്പിച്ചുകൊണ്ടിരിക്കുകയാണ് എന്ന് അവർ പറഞ്ഞു. ഗസ്സയിലെ ജനങ്ങളെ ഗസ്സ മുനമ്പിലെ ചെറിയ പ്രദേശങ്ങളിലേക്ക് നിർബന്ധിതമായും സ്ഥിരമായും മാറ്റിപ്പാർപ്പിക്കാനും മറ്റ് രാജ്യങ്ങളിലേക്കുള്ള കുടിയേറ്റം നിർബന്ധിക്കാനുമുള്ള"ഇസ്‌റാഈലിന്റെ 2025 മെയ് പദ്ധതി" അന്താരാഷ്ട്ര മാനുഷിക നിയമം, അന്താരാഷ്ട്ര ക്രിമിനൽ നിയമം, അന്താരാഷ്ട്ര മനുഷ്യാവകാശ നിയമം എന്നിവയുടെ ഗുരുതരമായ ലംഘനമാണ് എന്നും ഒപ്പിട്ടവർ ചൂണ്ടിക്കാട്ടി.

അതേസമയം മുതിർന്ന ഇസ്രായേലി മന്ത്രിമാർ ഗസ്സ മുനമ്പിന്റെ മുഴുവൻ പ്രദേശത്തിന്റെയും നിയന്ത്രണം ഏറ്റെടുക്കാനും ഹമാസ് നശിപ്പിക്കപ്പെടുന്നതുവരെ ആക്രമണം തുടരാനും ആവശ്യം ഉന്നയിച്ചിട്ടുണ്ട്. കൂടാതെ മുനമ്പിൽ അവശേഷിക്കുന്നവരെ തുടച്ചുനീക്കണമെന്നും മന്ത്രിമാർ ആവശ്യപ്പെടുന്നുണ്ട്.