ബോസ്റ്റൺ: ഹർവാർഡ് സർവകലാശാലയിൽ അന്താരാഷ്ട്ര വിദ്യാർത്ഥികളെ ചേർക്കുന്നതിന് തടസ്സം സൃഷ്ടിക്കാനുള്ള ട്രംപ് ഭരണകൂടത്തിന്റെ ശ്രമങ്ങൾ തടയാൻ യുഎസ് ഫെഡറൽ ജഡ്ജി അലിസൺ ബറോസ് താൽക്കാലിക ഉപരോധ ഉത്തരവ് വിപുലീകരിച്ചു. കഴിഞ്ഞ ആഴ്ച വൈറ്റ് ഹൗസ് ഹാർവാർഡിന്റെ ഫെഡറൽ സ്റ്റുഡന്റ് ആൻഡ് എക്സ്ചേഞ്ച് വിസിറ്റർ പ്രോഗ്രാം (SEVP) സർട്ടിഫിക്കേഷൻ റദ്ദാക്കുമെന്ന് പ്രഖ്യാപിച്ചതിന് പിന്നാലെ, ഹർവാർഡ് കോടതിയെ സമീപിച്ചതിനെ തുടർന്നാണ് ഈ ഉത്തരവ്. 

ഹർവാർഡിന്റെ അഭിഭാഷകർ ബോസ്റ്റണിലെ ഫെഡറൽ കോടതിയിൽ, അന്താരാഷ്ട്ര വിദ്യാർത്ഥികളെ ചേർക്കാനുള്ള അവകാശം റദ്ദാക്കുന്നത് യുഎസ് ഭരണഘടനയിലെ അഭിപ്രായ സ്വാതന്ത്ര്യം, ന്യായമായ നടപടിക്രമ അവകാശങ്ങൾ, നടപടിക്രമ നിയമങ്ങൾ എന്നിവയുടെ ലംഘനമാണെന്ന് വാദിച്ചു. കോടതി മുറിയിൽ നിരവധി അന്താരാഷ്ട്ര വിദ്യാർത്ഥികൾ ഹാജരായിരുന്നു. കേസ് പുരോഗമിക്കുന്നതുവരെ "നിലവിലുള്ള സ്ഥിതി" നിലനിർത്താൻ ജഡ്ജി ബറോസ് തീരുമാനിച്ചു. ഹോംലാൻഡ് സെക്യൂരിറ്റി വകുപ്പ് ഹാർവാർഡിന് നോട്ടീസ് അയച്ചെങ്കിലും, 30 ദിവസത്തിനുള്ളിൽ മറുപടി നൽകാൻ അവസരം നൽകി, ഉടനടി റദ്ദാക്കൽ നടപ്പാക്കുന്നതിൽ നിന്ന് പിന്മാറ്റം സൂചിപ്പിക്കുന്നു.

ഹാർവാർഡിന്റെ ഇമിഗ്രേഷൻ സർവീസസ് ഡയറക്ടർ സമർപ്പിച്ച കോടതി രേഖകളിൽ, ഭരണകൂടത്തിന്റെ പ്രഖ്യാപനം വിദ്യാർത്ഥികളിലും ഫാക്കൽറ്റിയിലും "അഗാധമായ ഭയവും ആശയക്കുഴപ്പവും" സൃഷ്ടിച്ചതായി വ്യക്തമാക്കി. "പല അന്താരാഷ്ട്ര വിദ്യാർത്ഥികളും മാനസിക സമ്മർദ്ദവും പഠനത്തിൽ ശ്രദ്ധ കേന്ദ്രീകരിക്കാനുള്ള ബുദ്ധിമുട്ടും അനുഭവിക്കുന്നു. ചിലർ കുടിയേറ്റ നടപടികളെ ഭയന്ന് ബിരുദദാന ചടങ്ങുകളിൽ പങ്കെടുക്കാൻ മടിക്കുന്നതായും," രേഖകൾ പറയുന്നു.

ഭീകരവാദ അനുകൂല പെരുമാറ്റം, ജൂതവിരുദ്ധവും അമേരിക്കൻ വിരുദ്ധവുമായ അക്രമം പ്രോത്സാഹിപ്പിക്കൽ, ചൈനീസ് കമ്മ്യൂണിസ്റ്റ് പാർട്ടിയുമായി ഏകോപനം" എന്നിവയാണ് ഹോംലാൻഡ് സെക്യൂരിറ്റി വകുപ്പ് മേധാവി ക്രിസ്റ്റി നോം ഹാർവാർഡിനെതിരെ ഉന്നയിച്ച ആരോപണങ്ങൾ. "SEVP മേൽനോട്ടം അനുസരിക്കാൻ ഹാർവാർഡ് വിസമ്മതിച്ചത് അമേരിക്കൻ ജനതയെ പുച്ഛിക്കുന്നതിന്റെ തെളിവാണ്," അവർ ആരോപിച്ചു. എന്നാൽ, ഈ ആരോപണങ്ങൾ ഹർവാർഡ് നിഷേധിച്ചു.

374-ാമത് ബിരുദദാന ചടങ്ങ്

ട്രംപ് ഭരണകൂടത്തിന്റെ ഭീഷണികൾക്കിടയിലും, ഹാർവാർഡ് സർവകലാശാല മെയ് 29-ന് 374-ാമത് ബിരുദദാന ചടങ്ങ് ആഘോഷിച്ചു. ഫിസിഷ്യനും എഴുത്തുകാരനുമായ എബ്രഹാം വർഗീസ് മുഖ്യപ്രഭാഷകനായിരുന്നു. ഉദ്ഘാടന ദിനത്തിന് മുമ്പ്, NBA ഹാൾ ഓഫ് ഫെയിമർ കരീം അബ്ദുൾ-ജബ്ബാർ "ക്ലാസ് ഡേ" പ്രഭാഷണം നടത്തി, പത്രപ്രവർത്തക ക്രിസ്റ്റ്യൻ അമൻപൂർ ഹാർവാർഡ് കെന്നഡി സ്കൂളിലെ ബിരുദധാരികളെ അഭിസംബോധന ചെയ്തു. ഹാർവാർഡ് പ്രസിഡന്റ് അലൻ ഗാർബറിന്റെ നിലപാടിനെ അബ്ദുൾ-ജബ്ബാർ പ്രശംസിച്ചു, "നിയമവിരുദ്ധവും അധാർമികവുമായ സമ്മർദ്ദങ്ങളെ ഡോ. ഗാർബർ നിരാകരിച്ചു," എന്ന് പറഞ്ഞു.

സാമ്പത്തിക-ഗവേഷണ ആഘാതം

ഹർവാർഡിനെതിരായ ഭരണകൂട നടപടി 5,000-ലധികം അന്താരാഷ്ട്ര വിദ്യാർത്ഥികളെയും 2,000 സമീപകാല ബിരുദധാരികളെയും ബാധിക്കും. ഏപ്രിലിൽ, 2 ബില്യൺ ഡോളറിലധികം ഗവേഷണ ഫണ്ടിംഗും 100 മില്യൺ ഡോളറിന്റെ കരാറുകളും ട്രംപ് ഭരണകൂടം തടഞ്ഞു. 53 ബില്യൺ ഡോളർ എൻഡോവ്‌മെന്റിന്റെ പിന്തുണയുണ്ടെങ്കിലും, ഈ നീക്കങ്ങൾ മെഡിക്കൽ, ശാസ്ത്ര ഗവേഷണങ്ങളെ പ്രതികൂലമായി ബാധിച്ചു. ട്രംപിന്റെ ഉത്തരവ് പ്രകാരം, അന്താരാഷ്ട്ര വിദ്യാർത്ഥികൾക്കുള്ള വിസ അഭിമുഖങ്ങൾ നിർത്തിവച്ചു, ഹർവാർഡിന്റെ അന്താരാഷ്ട്ര പ്രവേശനം 25%ൽ നിന്ന് 15% ആയി കുറയ്ക്കണമെന്ന് ആവശ്യപ്പെട്ടു.

വിദേശ സർവകലാശാലകളുടെ അവസരം

ഈ പ്രതിസന്ധി മുതലെടുത്ത് വിദേശ സർവകലാശാലകൾ ഹാർവാർഡ് വിദ്യാർത്ഥികളെ ആകർഷിക്കാൻ ശ്രമിക്കുന്നു. "അന്താരാഷ്ട്ര വിദ്യാർത്ഥികൾ യുഎസിന്റെ നവീകരണത്തിനും സാമ്പത്തിക ശക്തിക്കും വലിയ സംഭാവന നൽകുന്നു. അവരെ തടയുന്നത് അമേരിക്കയുടെ വിജയത്തെ ദുർബലപ്പെടുത്തും," അസോസിയേഷൻ ഓഫ് ഇന്റർനാഷണൽ എഡ്യൂക്കേറ്റേഴ്സ് (നഫ്സ) എക്സിക്യൂട്ടീവ് ഡയറക്ടർ ഫാന്റ ആവ് പറഞ്ഞു.