സഊദി ക്ലബ് അൽ നസറിനൊപ്പമുള്ള ക്രിസ്റ്റ്യാനോ റൊണാൾഡോയുടെ ഭാവി എന്താകുമെന്നാണ് ഫുട്ബോൾ ലോകം ഉറ്റുനോക്കുന്നത്. അൽ നസറിനൊപ്പമുള്ള റൊണാൾഡോയുടെ കരാർ അവസാന ഘട്ടത്തിലേക്ക് കടന്നിരിക്കുകയാണ്. താരം ടീം വിടുന്നുവെന്ന റിപ്പോർട്ടുകളും ശക്തമായി നിലനിൽക്കുന്നുണ്ട്.

ഇപ്പോൾ റൊണാൾഡോയെ സൈൻ ചെയ്യുന്നതിനെക്കുറിച്ച് സംസാരിക്കുകയാണ് ലാ ലിഗ ക്ലബ് റായോ വല്ലെക്കാനോ പ്രസിഡൻന്റ് റൗൾ മാർട്ടിൻ പ്രെസ. അടുത്ത സീസണിൽ റൊണാൾഡോയെ റായോ വല്ലെക്കാനോയിൽ എത്തിക്കാൻ താൻ ആഗ്രഹിക്കുന്നുവെന്നാണ് ക്ലബ്ബിന്റെ പ്രസിഡന്റ് അഭിപ്രായപ്പെട്ടത്. 

''ക്രിസ്റ്റ്യാനോ റൊണാൾഡോയെ ടീമിൽ എത്തിക്കാനായി വളരെ അടുത്തെത്തിയാൽ ഞാൻ സഊദി അറേബ്യയിൽ പോയിട്ടാണെങ്കിലും അവനെ ഇവിടേക്ക് കൊണ്ടുവരും'' റേഡിയോ മാർക്കയ്ക്ക് നൽകിയ അഭിമുഖത്തിൽ റൗൾ മാർട്ടിൻ പ്രെസ പറഞ്ഞു. 

അതേസമയം സഊദി പ്രോ ലീഗിൽ അൽഫത്തേഹിനെതിരെയുള മത്സരത്തിന് ശേഷം റൊണാൾഡോ തന്റെ സോഷ്യൽ മീഡിയയിൽ ഒരു പോസ്റ്റ് പങ്കുവെച്ചിരുന്നു. ഈ അധ്യായം ഇവിടെ അവസാനിച്ചു എന്നാണ് താരം സോഷ്യൽ മീഡിയയിൽ കുറിച്ചത്. ''കഥയോ? അത് ഇനിയും എഴുതപ്പെടുകയാണ്. എല്ലാവര്ക്കും നന്ദി'' റൊണാൾഡോ സോഷ്യൽ മീഡിയയിൽ പോസ്റ്റ് ചെയ്തു. 

റൊണാൾഡോയെ സ്വന്തമാക്കാൻ അൽ അഹ്ലി, പാൽമിറാസ്, ചെൽസി എന്നീ ടീമുകൾ ശ്രമിക്കുന്നുവെന്നും റിപ്പോർട്ടുകൾ നിലനിൽക്കുന്നുണ്ട്. വരാനിരിക്കുന്ന ഫിഫ ക്ലബ് ലോകകപ്പിൽ ഈ മൂന്ന് ക്ലബ്ബുകളും കളിക്കുന്നുണ്ട്. അതുകൊണ്ട് തന്നെ റൊണാൾഡോ ഈ ടൂർണമെന്റ് കളിക്കാനായി അൽ നസർ വിടാനുള്ള സാധ്യതകളും നിലനിൽക്കുന്നുണ്ട്. 

അൽ നസർ പരിശീലകൻ സ്റ്റെഫാനോ പിയോലിയുടെ തന്ത്രങ്ങളിൽ റൊണാൾഡോ തൃപ്തനല്ലെന്നും, ക്ലബുമായുള്ള കരാർ പുതുക്കുന്നതിന് മുൻപ് കോച്ച് പിയോലിയെയും സ്‌പോർട്ടിംഗ് ഡയറക്ടർ ഫെർണാണ്ടോ ഹിയേറോയെയും നീക്കം ചെയ്യണമെന്നും റൊണാൾഡോ ആവശ്യപ്പെട്ടതായി വാർത്തകളും നിലനിൽക്കുന്നുണ്ട്. 

2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത് റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു.