മസ്‌കത്ത്: ഒമാൻ സുൽത്താൻ ഹൈതം ബിൻ താരിക് അൽ സഈദ് ഇത്തവണ ബലി പെരുന്നാൾ നിസ്കാരം നിർവഹിക്കുക അൽ ദഖിലിയ ഗവർണറേറ്റിലെ നിസ്‌വയിലെ വിലായത്തിലുള്ള സുൽത്താൻ ഖാബൂസ് പള്ളിയിൽ. രാജകുടുംബാംഗങ്ങൾ, അൽ ബുസൈദ് കുടുംബം, മന്ത്രിമാർ, ഉപദേഷ്ടാക്കൾ, സുൽത്താന്റെ സായുധ സേനയുടെ കമാൻഡർമാർ, റോയൽ ഒമാൻ പോലീസ്, മറ്റ് സുരക്ഷാ ഏജൻസികൾ, അൽ ദഖിലിയ ഗവർണറേറ്റിലെ സ്റ്റേറ്റ് കൗൺസിൽ, ഷൂറ കൗൺസിൽ അംഗങ്ങൾ, അണ്ടർ സെക്രട്ടറിമാർ, വാലികൾ, മറ്റ് വിശിഷ്ട വ്യക്തികൾ, പൗരന്മാർ എന്നിവരും സുൽത്താനോട് ഒപ്പം നിസ്കരിക്കാൻ എത്തും. റോയൽ കോടതി പുറത്തിറക്കിയ പ്രസ്താവനയിൽ ആണ് ഇക്കാര്യം ഉളളത്. മറ്റ് ഗൾഫ് രാജ്യങ്ങളിലെതു പോലെ ഒമാനിൽ വെള്ളിയാഴ്ചയാണ് ബലി പെരുന്നാൾ. 

ബലിപെരുന്നാളിടോനുബന്ധിച്ചുള്ള ദേശീയ പൊതു അവധിദിനങ്ങള്‍ നേരത്തേ ഒമാൻ സുൽത്താൻ പ്രഖ്യാപിച്ചിരുന്നു. പൊതു, സ്വകാര്യ മേഖലയിലെ ജീവനക്കാര്‍ക്ക് അഞ്ച് ദിവസത്തെ അവധിയാണ് പ്രഖ്യാപിച്ചത്. രാജകീയ ഉത്തരവ് പ്രകാരം ജൂണ്‍ 5 വ്യാഴാഴ്ച തുടങ്ങി ജൂണ്‍ 9 തിങ്കളാഴ്ച വരെയാണ് അവധി നീണ്ടുനില്‍ക്കുക. സര്‍ക്കാര്‍ ഓഫീസുകളിലും സ്വകാര്യ സ്ഥാപനങ്ങളിലും സാധാരണ പ്രവൃത്തി സമയം ജൂണ്‍ 10 ചൊവ്വാഴ്ച പുനരാരംഭിക്കും.  പൗരന്മാര്‍ക്കും താമസക്കാര്‍ക്കും അവരുടെ കുടുംബങ്ങളോടും പ്രിയപ്പെട്ടവരോടും ഒപ്പം മതപരമായ പരിശുദ്ധ സമയങ്ങള്‍ ചെലവഴിക്കാന്‍ പ്രാപ്തരാക്കുന്നതിനുള്ള രാജ്യത്തിന്റെ പ്രതിബദ്ധതയെ അടിവരയിടുന്നതാണ് അവധി പ്രഖ്യാപനമെന്ന് ഔദ്യോഗിക ഉത്തരവില്‍ പറയുന്നു.

Sultan Haitham to perform Eid Al Adha prayers at Sultan Qaboos Mosque in Nizwa