ന്യൂഡല്‍ഹി: നിലമ്പൂര്‍ ഉപതെരഞ്ഞെടുപ്പിൽ തൃണമൂൽ കോൺഗ്രസ് പിന്തുണയോടെ സ്വതന്ത്ര സ്ഥാനാർഥിയായി മത്സരിക്കുന്ന പി.വി അൻവറിനെ പിന്തുണക്കില്ലെന്ന് ആം ആദ്മി പാർട്ടി. ഒരു സാഹചര്യത്തിലും പിന്തുണ നൽകാൻ ആം ആദ്മി പാർട്ടി തീരുമാനിച്ചിരുന്നില്ലെന്ന് പാർട്ടിയുടെ ദേശീയ നേതാവ് ഷെല്ലി ഒബ്റോയ് പ്രതികരിച്ചു.

സ്വതന്ത്ര സ്ഥാനാർഥിയായോ തൃണമൂൽ കോൺഗ്രസ് സ്ഥാനാർഥിയായോ ആം ആദ്മി പി.വി അൻവറിനെ പിന്തുണക്കില്ല. പി.വി അൻവറിനെ പിന്തുണക്കേണ്ട ആവശ്യമില്ല എന്നും കേരളത്തിന്റെ ചുമതലയുള്ള ഒബ്റോയ് പറഞ്ഞു. അടുത്ത ആഴ്ച താൻ കേരളത്തിൽ എത്തി പാർട്ടി നേതാക്കളെ കാണുമെന്നും ഇവർ അറിയിച്ചു.

അതേസമയം, പി.വി അൻവർ സ്ഥാനാർഥി പ്രഖ്യാപനം നടത്തിയതിന് ശേഷം നടന്ന പ്രകടനത്തിലും പ്രകടന പത്രിക നൽകാൻ പോയ ജാഥയിലും ആം ആദ്മി പ്രവർത്തകർ പങ്കെടുക്കുകയും പാർട്ടി പതാക വ്യാപകമായി ഉപയോഗിക്കുകയും ചെയ്തിരുന്നു. ആം ആദ്മി പിന്തുണ ഉണ്ടെന്ന തരത്തിൽ പ്രചാരണവും നടന്നിരുന്നു. ഈ സാഹചര്യത്തിലാണ് കേരളത്തിന്റെ ചുമതലയുള്ള നേതാവിന്റെ പ്രതികരണം വരുന്നത്. 

ഇതിനിടെ, സ്വാതന്ത്രനായി മത്സരിക്കുന്ന പി.വി അൻവറിന്റെ ചിഹ്നത്തില്‍ ഇന്ന് തീരുമാനമുണ്ടാകും. കഴിഞ്ഞ രണ്ട് തവണയും എൽഡിഎഫ് പിൻതുണയോടെ സ്വതന്ത്രനായി മത്സരിച്ച് വിജയിച്ച ഓട്ടോറിക്ഷ തന്നെ ചിഹ്നമായിലഭിക്കുമെന്നാണ് അൻവർ പ്രതീക്ഷിക്കുന്നത്.