നിലമ്പൂര്‍: നിലമ്പൂരില്‍ ഇന്ന് ഉപതെരഞ്ഞെടുപ്പ് ആരംഭിച്ചു. ബൂത്തുകളില്‍ അതിരാവിലെ മുതല്‍ വോട്ടര്‍മാര്‍ വോട്ട് രേഖപ്പെടുത്താന്‍ എത്തിത്തുടങ്ങി. നിലമ്പൂര്‍ ആയിഷ മുക്കട്ട ഗവ. എല്‍പി സ്‌കൂളിലെത്തി വോട്ട് ചെയ്തു. ബൂത്തിലെ ആദ്യവോട്ടാണ് ആയിഷ രേഖപ്പെടുത്തിയത്. സ്വരാജ് ജയിക്കുമെന്നും അതില്‍ യാതൊരു സംശയവുമില്ലെന്നും നിലമ്പൂര്‍ ആയിഷ വോട്ട് രേഖപ്പെടുത്തി മടങ്ങവേ മാധ്യമങ്ങളോട് പ്രതികരിച്ചു. കൂറേ കാലങ്ങള്‍ക്കു ശേഷമാണ് ബൂത്തിലെത്തുന്നതെന്നും ബൂത്ത് കണ്ടപ്പോള്‍ തന്നെ സന്തോഷം തോന്നിയെന്നും ഞങ്ങള്‍ ജയിക്കുമെന്നുമാണ് ആയിഷ പറയുന്നത്.

ഇടതു മുന്നണി സ്ഥാനാര്‍ഥി എം സ്വരാജ് മാങ്കുത്ത് എല്‍പി സ്‌കൂളിലും വോട്ട് രേഖപ്പെടുത്തി. യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത് നിലമ്പൂര്‍ വീട്ടിക്കുത്ത് ഗവണ്‍മെന്റ് എല്‍പി സ്‌കൂളിലെ 184ാം നമ്പര്‍ ബൂത്തില്‍ വോട്ട് ചെയ്തു. സ്വതന്ത്ര സ്ഥാനാര്‍ഥിയായ പിവി അന്‍വറിന് മണ്ഡലത്തില്‍ വോട്ടില്ല. 

പിവി അന്‍വര്‍ രാജിവച്ചതിനെ തുടര്‍ന്നാണ് നിലമ്പൂരില്‍ ഉപതെരഞ്ഞെടുപ്പ് നടക്കുന്നത്. രാവിലെ 7 മണിമുതല്‍ വൈകീട്ട് 6 മണിവരെയാണ് പോളിങ്. രാവിലെ 5.30 മുതല്‍ മോക് പോളിങ് തുടങ്ങി. 263 പോളിങ് ബൂത്തുകളാണ് സജ്ജീകരിച്ചിരിക്കുന്നത്. ആദിവാസി മേഖലകള്‍ ഉള്‍പ്പെടുന്ന വനത്തിലെ മൂന്നു ബൂത്തുകള്‍ ഉള്‍പ്പെടെയാണ് 263 ബൂത്തുകള്‍. ഇതില്‍ 11 ബൂത്തുകള്‍ പ്രശ്‌നബാധിത ബൂത്തുകളുമാണ്. പോളിങ് സാമഗ്രികള്‍ ചുങ്കത്തറ മാര്‍തോമ ഹയര്‍ സെക്കന്‍ഡറി സ്‌കൂളില്‍ നിന്ന് ഇന്നലെ ഉച്ചയോടെ തന്നെ പോളിങ് സ്‌റ്റേഷനുകളില്‍ എത്തിച്ചിരുന്നു.