ഹൈദരാബാദ്: സംസ്ഥാന വ്യാപകമായി നടപ്പിലാക്കുന്ന ഋതു ദരോസ പദ്ധതിയിൽ നിന്നും കുടുംബത്തിന് ലഭിച്ച പണത്തിനെക്കുറിച്ചുള്ള തർക്കത്തിൽ യുവാവ് പിതാവിന്റെ നാവ് മുറിച്ചുമാറ്റി. മേഡക് ജില്ലയിലെ ഔറംഗാബാദിലാണ് സംഭവം നടന്നത്. 

പിതാവായ കീര്യ നായകിന് ദരോസ പദ്ധതിയിൽ നിന്നും ലഭിച്ച ആറായിരം രൂപ മകനായ സന്തോഷ് തനിക്ക് നൽകണമെന്ന് ആവശ്യപ്പെടുകയായിരുന്നു. എന്നാൽ ഇതിൽ നിന്നും തന്റെ ചികിത്സ ചെലവുകൾക്ക് വേണ്ടി പിതാവ് 2000 രൂപ ചെലവാക്കിയിരുന്നു. ഇതിൽ പ്രകോപിതനായ മകൻ പിതാവുമായി വാക്കു തർക്കത്തിൽ ഏർപ്പെടുകയായിരുന്നു. തുടർന്ന് പിതാവിനെ അരിവാൾ കൊണ്ട് ആക്രമിച്ച് നാവ് മുറിച്ചുമാറ്റുകയായിരുന്നു. 

സംഭവത്തിൽ കുടുംബാംഗങ്ങൾ കീര്യയെ മേഡക്കലിലെ സർക്കാർ ആശുപത്രിയിൽ പ്രവേശിപ്പിച്ചു. പിതാവിന് നിലവിൽ സംസാരിക്കാൻ സാധിക്കുന്നില്ലെന്നും എന്നാൽ ഇത് ക്രമേണ സുഖം പ്രാപിക്കും എന്നുമാണ് ഡോക്ടർമാർ വ്യക്തമാക്കിയത്.