വാഷിങ്ടണ്‍/തെല്‍അവീവ്:  ഗസ്സയില്‍ 20 മാസമായി ഇസ്‌റാഈല്‍ നടത്തുന്ന അധിനിവേശം പൂര്‍ണമായി അവസാനിപ്പിക്കാന്‍ യു.എസ് പ്രസിഡന്റ് ഡൊണാൾഡ് ട്രംപ് നീക്കം തുടങ്ങിയതായി റിപ്പോര്‍ട്ടുകള്‍. 12 ദിവസത്തെ ഇറാനുമായുള്ള ഇസ്‌റാഈലിന്റെ യുദ്ധം അവസാനിപ്പിച്ചിതിനു പിന്നാലെയാണ് ട്രംപിന്റെ പുതിയ സമാധാന നീക്കമെന്നും ഇതിനായി അദ്ദേഹം ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹുവിന് മുന്നില്‍ ഓഫര്‍ വച്ചതായും ഹീബ്രു മാധ്യമങ്ങള്‍ റിപ്പോര്‍ട്ട് ചെയ്തതായി ഇസ്‌റാഈലിലെ ഇംഗ്ലിഷ് പത്രങ്ങള്‍ പറഞ്ഞു.  

ഇസ്‌റാഈലുമായുള്ള അബ്രഹാം സമാധാന ഉടമ്പടിയില്‍ പുതിയൊരു രാജ്യം കൂടി ചേരുമെന്നും ഇതു അമേരിക്കയോ അവരുടെ ഉറ്റ സുഹൃത്തായ മറ്റൊരു അറബ് രാജ്യമോ ആകുമെന്നും സൂചനയുണ്ട്. ഭാവി സ്വതന്ത്ര ഫലസ്തീന്‍ രാഷ്ട്രത്തിന്റെ സ്ഥാപനത്തിന് ഇസ്‌റാഈലിന്റെ പിന്തുണ ഉറപ്പാക്കുകയാണ് ലക്ഷ്യം. ഇസ്‌റാഈലിനെ ഇറാന്റെ ആക്രമണത്തില്‍നിന്ന് സംരക്ഷിച്ച ട്രംപ് ഇപ്പോള്‍ നെതന്യാഹുവിനെ കേസില്‍നിന്ന് രക്ഷപ്പെടുത്തുന്നു എന്നാണ് റിപ്പോര്‍ട്ടുകള്‍. അധികാരം ഒഴിഞ്ഞാല്‍ നെതന്യാഹു ജയിലിലാകുന്ന സ്ഥിതിയാണ് ഇപ്പോഴുള്ളത്. അദ്ദേഹത്തെ അഴിമതിക്കേസില്‍ കോടതി കുറ്റക്കാരനെന്ന് കണ്ടെത്തിയിട്ടുണ്ട്. കൂടാതെ അന്താരാഷ്ട്ര ക്രിമിനല്‍ കോടതിയുടെ അറസ്റ്റ് വാറണ്ട് വംശഹത്യാ കേസിലും നിലനില്‍ക്കുന്നു. നെതന്യാഹുവിനെ ക്രിമിനല്‍ വിചാരണ ഒഴിവാക്കാന്‍ ആവശ്യമായ കാര്യങ്ങള്‍ ചെയ്യാമെന്നാണ് ട്രംപ് മുന്നോട്ടുവച്ച ഓഫര്‍. ഇതിനു പകരമായി ഗസ്സയിലെ ആക്രമണം പൂര്‍ണമായി അവസാനിപ്പിക്കണം.

ഈ വിഷയം തിങ്കളാഴ്ച നെതന്യാഹുവിനെ ഫോണില്‍ വിളിച്ച് ട്രംപ് പറഞ്ഞതായാണ് വാര്‍ത്തകള്‍. സന്തോഷം നിറഞ്ഞ ഫോണ്‍ വിളിയെന്നാണ് ഇതിനെ ട്രംപുമായി അടുത്ത വൃത്തങ്ങള്‍ വിശേഷിപ്പിച്ചത്. ഇറാന്‍ ആക്രമണത്തില്‍നിന്ന് രക്ഷപ്പെട്ട സന്തോഷത്തിലാണ് നെതന്യാഹു. തങ്ങളില്ലെങ്കില്‍ ഇസ്‌റാഈല്‍ ബാക്കിയുണ്ടാകില്ലെന്നും ട്രംപ് നെതന്യാഹുവിനെ ഓര്‍മപ്പെടുത്തി. ഇസ്‌റാഈലിനു നേരെ നൂതന മിസൈലുകള്‍ പ്രയോഗിക്കാന്‍ ഇറാന്‍ ഒരുങ്ങുകയായിരുന്നുവെന്ന് ഇസ്‌റാഈല്‍ ഇന്റലിജന്‍സ് റിപ്പോര്‍ട്ടുമുണ്ടായിരുന്നു. 
ട്രംപും നെതന്യാഹുവുമായുള്ള ഫോണ്‍ വിളിയില്‍ യു.എസ് സ്റ്റേറ്റ് സെക്രട്ടറി മാര്‍കോ റൂബിയോയും ഇസ്‌റാഈല്‍ സ്ട്രാറ്റജികാര്യ മന്ത്രി റോണ്‍ ഡെര്‍മെറും പങ്കെടുത്തതായി ടൈംസ് ഓഫ് ഇസ്‌റാഈല്‍ റിപ്പോര്‍ട്ട് ചെയ്തു. 

നെതന്യാഹു നിരവധി കേസുകളില്‍ വിചാരണ നേരിടുന്നുണ്ട്. ഇതു അവസാനിപ്പിക്കുമെന്ന് ട്രംപ് ഉറപ്പുനല്‍കിയെന്നാണ് നെതന്യാഹുവുമായി അടുത്ത ബന്ധമുള്ള വൃത്തങ്ങള്‍ പറയുന്നത്. എന്നാല്‍, എങ്ങനെയാണ് ഇതു നടപ്പാക്കുകയെന്ന് വ്യക്തമല്ലെന്ന് ഇസ്‌റാഈല്‍ ചാനലായ കാന്‍ പറയുന്നു. ഈയിടെ നെതന്യാഹുവിനെ കേസില്‍നിന്ന് രക്ഷപ്പെടുത്താന്‍ അദ്ദേഹത്തിന്റെ അഭിഭാഷകര്‍ ഹരജി ഫയല്‍ ചെയ്തിട്ടുണ്ടെന്ന് ചാനല്‍ 12 റിപ്പോര്‍ട്ട് ചെയ്തു. 

US President Donald Trump is urging Israeli PM Benjamin Netanyahu to end the Gaza war within two weeks, aiming to free hostages, exile Hamas leadership, and expand the Abraham Accords with Arab states governing Gaza. Trump also demands a pardon for Netanyahu’s corruption trial, calling it a “witch hunt.” The plan includes US recognition of limited Israeli sovereignty in parts of the West Bank and a future two-state solution.