മസ്‌കത്ത്: രാജ്യത്തെ ഉപഭോക്തൃ സംരക്ഷണ നിയമങ്ങൾ ലംഘിച്ചതിന് മസ്‌കത്തിലെ വിവിധ ഇടങ്ങളിൽ നിന്ന് 347 കളിപ്പാട്ടങ്ങളും സ്കൂൾ സാധനങ്ങളും പിടിച്ചെടുത്തതായി അതീർ ഒമാൻ റിപ്പോർട്ട് ചെയ്തു. തലയോട്ടിയുടെ ചിത്രങ്ങൾ ഉൾപ്പെടുത്തിയ കുറോമി പാവകളും സ്കൂൾ മറ്റ് ഉപകരണങ്ങളുമാണ് വിവിധ വാണിജ്യ ഔട്ട്‌ലെറ്റുകളിൽ നിന്ന് ഇൻസ്‌പെക്ടർമാർ കണ്ടുകെട്ടിയത്.

ALSO READ: ആര്‍എസ്എസ് ശതാബ്ദി ആഘോഷം: ക്ഷണിച്ചെങ്കിലും ഗള്‍ഫ്, അറബ് പ്രതിനിധികള്‍ വിട്ടുനിന്നു; പങ്കെടുത്തത് 50 ലധികം നയതന്ത്രജ്ഞര്‍ 

കുറോമി പാവയുടെ ഡിസൈനിനെക്കുറിച്ചുള്ള പരാതിയാണ് നടപടിക്ക് കാരണമായത്. തുടർന്ന് നടത്തിയ പരിശോധനയിൽ, സ്കൂൾ ഉപകരണങ്ങളിൽ ഈ ഡിസൈൻ വ്യാപകമായി ഉപയോഗിക്കുന്നതായി കണ്ടെത്തിയിരുന്നു. നിയമലംഘനം സ്ഥിരീകരിച്ച അധികൃതർ ഈ ഉൽപ്പന്നങ്ങൾ ഷെൽഫുകളിൽ നിന്ന് നീക്കം ചെയ്യുകയും വ്യാപാരികൾക്ക് പിഴ ചുമത്തുകയും ചെയ്തു.

ഒമാന്റെ ഉപഭോക്തൃ സംരക്ഷണ നിയമം, മതവിരുദ്ധമോ, പൊതു ധാർമ്മികതയ്ക്ക് എതിരോ, പ്രാദേശിക പാരമ്പര്യങ്ങളും ആചാരങ്ങളും ലംഘിക്കുന്നതോ ആയ ചിഹ്നങ്ങൾ, മുദ്രാവാക്യങ്ങൾ, ചിത്രങ്ങൾ എന്നിവ പ്രദർശിപ്പിക്കുന്ന ഉൽപ്പന്നങ്ങൾ കർശനമായി നിരോധിച്ചിട്ടുണ്ട്. അസഭ്യവും അനുചിതവുമായ വസ്തുക്കളും ഇതിന്റെ പരിധിയിൽ വരും. നിയമം ലംഘിച്ച് തലയോട്ടിയുടെ ചിത്രങ്ങൾ അടങ്ങിയ ഉൽപ്പന്നങ്ങൾ വിൽപ്പന നടത്തിയതിനാണ് വ്യപാരികൾക്കെതിരെ പിഴ ചുമത്തിയത്.

ALSO READ: ഐഫോൺ 17 ലോഞ്ച് സെപ്തംബർ ഒമ്പതിന്; പ്രമുഖ ജിസിസി രാജ്യത്ത് എപ്പോൾ ലഭ്യമാകുമെന്ന് അറിയാം 

ഒമാന്റെ വിപണികളെ സുരക്ഷിതവും നിയന്ത്രിതവുമായി നിലനിർത്താനും സാംസ്കാരിക-ധാർമ്മിക മൂല്യങ്ങൾ സംരക്ഷിക്കാനുമുള്ള ശ്രമങ്ങളുടെ ഭാഗമായാണ് നടപടിയെന്ന് ഉപഭോക്തൃ സംരക്ഷണ അതോറിറ്റി വ്യക്തമാക്കി. രാജ്യവ്യാപകമായി പരിശോധനകളും നിരീക്ഷണ കാമ്പെയ്‌നുകളും തുടരുമെന്ന് പറഞ്ഞ അതോറിറ്റി ലംഘനങ്ങൾ ഔദ്യോഗിക മാർഗങ്ങളിലൂടെ റിപ്പോർട്ട് ചെയ്യാൻ പൊതുജനങ്ങളോട് അഭ്യർത്ഥിക്കുകയും ചെയ്തു. ലബുബു എന്ന മറ്റൊരു ജനപ്രിയ കളിപ്പാട്ടം ഒമാനിൽ നിരോധിച്ചുവെന്ന അഭ്യൂഹങ്ങൾ ഓൺലൈനിൽ പ്രചരിച്ചിരുന്നു. എന്നാൽ ലബുബു നിരോധിച്ചിട്ടില്ലെന്ന് അതോറിറ്റി വ്യക്തമാക്കി.

Oman’s Consumer Protection Authority refutes rumors, confirming that only Kuromi products with skull designs were banned for violating regulations, not Labubu toys. The clarification addresses misinformation spreading online about the toy ban.