ഇന്ത്യൻ ഏകദിന നായകൻ രോഹിത് ശർമ്മയെ പ്രശംസിച്ച് മുൻ ഇന്ത്യൻ താരം സുരേഷ് റെയ്‌ന. ക്യാപ്റ്റനെന്ന നിലയിൽ രോഹിത് ശർമ്മ സ്വന്തമാക്കിയ നേട്ടങ്ങളെക്കുറിച്ചാണ് റെയ്‌ന സംസാരിച്ചത്. രോഹിത് ഇന്ത്യൻ ക്രിക്കറ്റിനെ മാറ്റിമറിച്ചെന്നും റെയ്‌ന പറഞ്ഞു. ശുഭങ്കർ മിശ്രയുടെ യുട്യൂബ് ചാനലിലൂടെ സംസാരിക്കുകയായിരുന്നു റെയ്‌ന. 

''രോഹിത് ശർമ്മ ഇന്ത്യൻ ക്രിക്കറ്റിനെ വളരെയധികം മാറ്റിമറിച്ചു. ഇന്ത്യൻ ക്രിക്കറ്റിലെ അദ്ദേഹത്തിന്റെ സ്വാധീനം വളരെ വലുതാണ്. ഇംഗ്ലണ്ടിൽ ഏറ്റവും കൂടുതൽ സെഞ്ച്വറി നേടിയ ഇന്ത്യൻ താരം അദ്ദേഹമാണ്. ഇന്ത്യക്കായി അദ്ദേഹം ക്യാപ്റ്റനെന്ന നിലയിൽ 2024 ടി-20 ലോകകപ്പ്, 2025 ചാമ്പ്യൻസ് ട്രോഫി എന്നിവ നേടിയിട്ടുണ്ട്. അഞ്ച് ഐപിഎൽ ട്രോഫികളും അദ്ദേഹം നേടി. ഒരു ലീഡർ എന്ന നിലയിൽ അദ്ദേഹം മികച്ചവനാണ്'' സുരേഷ് റെയ്‌ന പറഞ്ഞു. 

രോഹിത് ശർമ്മ ഇന്ത്യയുടെ എക്കാലത്തെയും മികച്ച ക്യാപ്റ്റൻമാരിൽ ഒരാളാണ്. 2024 ടി-20 ലോകകപ്പ് ഇന്ത്യ സ്വന്തമാക്കിയിരുന്നത് രോഹിത്തിന്റെ കീഴിലായിരുന്നു. ഈ വർഷം നടന്ന ഐസിസി ചാമ്പ്യൻസ് ട്രോഫിയും ഇന്ത്യ നേടിയത് രോഹിത്തിന്റെ കീഴിലാണ്. ഇതിനു പുറമെ ഇന്ത്യൻ പ്രീമിയർ ലീഗിൽ മുംബൈ ഇന്ത്യൻസിന് അഞ്ചു ഐപിഎൽ കിരീടം നേടികൊടുക്കാനും രോഹിത്തിന് സാധിച്ചു. 

ഏകദിനത്തിൽ 11168 റൺസാണ് രോഹിത് അടിച്ചെടുത്തത്. ടി-20യിൽ 4231 റൺസും താരം സ്വന്തമാക്കി. ഇന്ത്യയ്ക്കായി 2013ൽ ടെസ്റ്റ് ക്രിക്കറ്റിൽ അരങ്ങേറ്റം കുറിച്ച രോഹിത് 67 മത്സരങ്ങളിൽ 116 ഇന്നിംഗ്സുകളിൽ നിന്നും 4301 റൺസ് ആണ് നേടിയത്. 12 സെഞ്ച്വറിയും ഒരു ഇരട്ട സെഞ്ച്വറിയും താരം ടെസ്റ്റിൽ നേടിയിട്ടുണ്ട്.

രോഹിത് ശർമ്മ ടെസ്റ്റ് ക്രിക്കറ്റിൽ നിന്നും അടുത്തിടെ വിരമിക്കൽ പ്രഖ്യാപിച്ചിരുന്നു. ഇംഗ്ലണ്ടിനെതിരെയുള്ള ടെസ്റ്റ് പരമ്പരക്ക് മുമ്പാണ്  രോഹിത് വിരമിക്കൽ പ്രഖ്യാപിച്ചത്. 2024 ടി-20 ലോകകപ്പ് വിജയത്തിന് പിന്നാലെ രോഹിത് കുട്ടിക്രിക്കറ്റിന്റെ ഫോർമാറ്റിൽ നിന്നും വിരമിക്കൽ പ്രഖ്യാപിച്ചിരുന്നു. ഈ രണ്ട് ഫോർമാറ്റുകളിൽ നിന്നും വിരമിച്ചെങ്കിലും രോഹിത് ഏകദിനത്തിൽ ക്യാപ്റ്റനായി തുടരും.

Former Indian player Suresh Raina praised Indian ODI captain Rohit Sharma. Raina spoke about Rohit Sharma's achievements as captain.