അബൂദബി: ഹണ്ടിംഗ് ആൻഡ് ഇക്വസ്ട്രിയൻ എക്സ്പോ 2025 (ADIHEX) ന്റെ സമയത്ത് ഡ്രൈവർമാർക്ക് ട്രാഫിക് പോയിന്റ് കുറയ്ക്കാനും റദ്ദാക്കപ്പെട്ട ലൈസൻസ് തിരികെ നേടാനും അവസരമൊരുക്കുന്നതായി അബൂദബി പൊലിസ്. ആഗസ്റ്റ് 30 മുതൽ സെപ്റ്റംബർ 7 വരെയാണ് ഹണ്ടിംഗ് ആൻഡ് ഇക്വസ്ട്രിയൻ എക്സ്പോ 2025 നടക്കുന്നത്.

ALSO READ: രൂപയുടെ തകർച്ച മുതലെടുത്ത് യുഎഇയിലെ പ്രവാസികൾ; നാട്ടിലേക്ക് പണം അയക്കാൻ വലിയ തിരക്ക് 

എക്സ്പോയുടെ ഭാ​ഗമായി നടത്തുന്ന ബോധവൽക്കരണ ക്ലാസുകളിൽ പങ്കെടുക്കുക വഴിയാകും ബ്ലാക്ക് പോയിന്റുകൾ കുറയ്ക്കാൻ അവസരം ഉണ്ടാകുക. എട്ടു മുതൽ 23 ബ്ലാക്ക് പോയിന്റുകൾ വരെ ഉള്ള താമസക്കാർക്ക് 800 ദിർഹം അടച്ച് ബോധവൽക്കരണ ക്ലാസിൽ പങ്കെടുത്താൽ 8 പോയിന്റുകൾ ലൈസൻസിൽ നിന്ന് കുറയ്ക്കും.

24 ബ്ലാക്ക് പോയിന്റുകൾ ഉള്ള താമസക്കാരുടെ ലൈസൻസ് ഇതിനകം തന്നെ റദ്ദാക്കിയിട്ടുണ്ടാകും. 24 ബ്ലാക്ക് പോയിന്റുകൾ ഉള്ളവർ 2400 ദിർഹം നൽകി വേണം ക്ലാസിൽ പങ്കെടുക്കാൻ. ക്ലാസ് കഴിഞ്ഞാൽ ലൈസൻസ് തിരിച്ചു നൽകുമെന്ന് അബൂദബി പൊലിസ് വ്യക്തമാക്കി. ഈ മാസം ആഗസ്റ്റ് 25ന് അപകടരഹിതമായി വാഹനം ഓടിക്കുകയാണെങ്കിൽ നാല് ബ്ലാക്ക് പോയിന്റുകൾ തുറക്കുമെന്ന് യുഎഇ ആഭ്യന്തര മന്ത്രാലയം അറിയിച്ചിരുന്നു. ഈ പദ്ധതി വൻ വിജയമായി തീർന്നിരുന്നു.

ALSO READ: താമസക്കാരുടെ ശ്രദ്ധയ്ക്ക്, അജ്ഞാത നമ്പറുകളില്‍ നിന്നുള്ള ഫോണ്‍ കോളുകള്‍ക്കെതിരെ മുന്നറിയിപ്പുമായി യുഎഇ മാനവ വിഭവശേഷി മന്ത്രാലയം 

കുതിരസവാരി, പൈതൃക സംരക്ഷണം എന്നിവയുടെ വാർഷിക പ്രദർശനമാണ് ഹണ്ടിംഗ് ആൻഡ് ഇക്വസ്ട്രിയൻ എക്സ്പോ. 40-ലധികം രാജ്യങ്ങളിൽ നിന്നായി 100,000-ത്തിലധികം സന്ദർശകർ മേളയിൽ പങ്കെടുക്കുമെന്നാണ് പ്രതീക്ഷിക്കുന്നത്. ഈ വർഷം, ഒട്ടകങ്ങൾ, അറേബ്യൻ സലൂക്കി, കത്തികൾ, സൂഖ് എന്നിവയെ കേന്ദ്രീകരിച്ച് നാല് പുതിയ മേഖലകൾ കൂടി മേളയിൽ അവതരിപ്പിക്കും. അബൂദബി പൊലിസിന്റെ ട്രാഫിക് പോയിന്റിലെ ഇളവും മേളയുടെ പ്രധാന ആകർഷണങ്ങളിൽ ഒന്നാണ്.

Abu Dhabi Police announces a major initiative during ADIHEX 2025, allowing drivers to reduce up to 8 black points or reinstate canceled licenses through educational courses. This program promotes road safety and responsible driving.